Qaraǵandynyń joldarynda 800-den astam quqyq buzýshylyq anyqtaldy
QARAǴANDY. KAZINFORM — Qaraǵandy oblysynda qoǵamdyq qaýipsizdikti qamtamasyz etý men quqyq buzýshylyqtyń aldyn alýǵa baǵyttalǵan aýqymdy profılaktıkalyq is-sharalar jalǵasyp jatyr, dep habarlaıdy Polisia.kz.
Bul sharalar óńirdegi quqyqtyq tártipti nyǵaıtyp, jol qozǵalysy mádenıetin arttyrýǵa baǵyttalǵan.
Іs-sharaǵa ýchaskelik polıtsııa ınspektorlary, patrýldik polıtsııa batalony men polkiniń qyzmetkerleri, sondaı-aq Ulttyq ulan jaýyngerleri jumyldyryldy.
Reıd barysy polıtsııa departamentiniń ákimshilik polıtsııa basqarmasy basshylyǵynyń tikeleı baqylaýynda ótti.
Ákimshilik polıtsııa basqarmasynyń bastyǵy Baǵdat Kakımovtyń aıtýynsha, mundaǵy basty maqsat — jazalaý emes, quqyq buzýshylyqtyń aldyn alý jáne turǵyndarǵa túsindirý jumystaryn júrgizý. Alaıda júrgizilgen profılaktıkalyq sharalarǵa qaramastan, bir táýlik ishinde oblys boıynsha jol qozǵalysy erejelerin buzýdyń 800-den astam deregi tirkelgen. Onyń ishinde 70 jaǵdaı óreskel quqyq buzýshylyq sanatyna jatady.
Buǵan deıin Qaraǵandyda zeınetkerdi azaptaǵan bir top jasóspirimniń sottalǵanyn habarladyq.
