Qaraǵandynyń saıabaqtarynan 5 myńnan asa kene tabyldy
QARAǴANDY. KAZINFORM — Qaraǵandy oblysynda saıabaqtar men skverlerde keneler men jándikterden zalalsyzdandyrý jumystary bastaldy. Demalys aımaqtarynan myńdaǵan kene tabyldy, sondaı-aq óńirde ondaǵan turǵyn jándikterdiń shaǵýyna baılanysty shaǵymdanǵan.
16–19 mamyr aralyǵynda Qaraǵandyda saıabaqtar, skverler jáne demalys aımaqtary kenelerden, jándikterden jáne basqa da zııankesterden túngi ýaqytta zalalsyzdandyryldy. Jumystar turǵyndardyń demalys ýaqytyna kedergi ketirmes úshin túngi 02:00–den 06:00–ge deıingi aralyqta júrgiziledi.
Qaraǵandy ákimdigi dezınsektsııalyq sharalardyń kestesin naqtylady:
- 16 mamyr — qalanyń ońtústik-shyǵysy, Fedorov sý qoımasy jáne qalalyq jaǵajaı;
- 17–18 mamyr — qala ortalyǵy men Prıshahtınsk;
- 19 mamyr — Maıqudyq pen Sortırovka.
Ákimdik turǵyndardan kórsetilgen ýaqytta ýaqytsha óńdelgen aımaqtarǵa barmaýdy surady.
Sonymen qatar óńirde kenelerdiń órshýine baılanysty epıdemıologııalyq monıtorıng júrgizilip jatyr. 2026 jyldyń alǵashqy tórt aıynda tabıǵı ortadan 5645 kene jınaldy, taǵy 302 kene adamdardan alynǵan: onyń 180 jaǵdaıy Qaraǵandyda, 48-i Temirtaýda, 20-sy Saranda, 20-sy Shahtınskide jáne 34-i oblys aýdandarynda tirkelgen. Mamandardyń málimetinshe, zerttelgen materıaldardan ınfektsııalar anyqtalmaǵan.
Qaraǵandy oblysynyń sanıtarııalyq-epıdemıologııalyq baqylaý departamentiniń basshysy ıÝrıı Zalygın profılaktıkalyq jumystar jyl saıyn júrgiziletinin jáne keshendi sharalardy qamtıtynyn atap ótti.
— Jyly kúnderdiń bastalýymen Ulttyq saraptama ortalyǵy mamandary kiretin zoologııalyq-parazıtologııalyq toptardyń monıtorıngtik saparlary ótkiziledi. Olar keneler men olardyń qorek kózderin jınap, sanynyń ózgerý dınamıkasyn baqylaıdy, al jınalǵan materıal asa qaýipti ınfektsııalar zerthanalaryna jiberiledi. Bul — memlekettik tapsyrys aıasyndaǵy josparly jumys. Bıylǵy jyldyń alǵashqy tórt aıynda tabıǵı ortadan 5600-den astam kene jınalyp, jándikterdiń adamdardy shaǵý jaǵdaılary da tirkeldi. Sonymen qatar óńir aýmaǵynda zerttelgen úlgilerden qaýipti ınfektsııalar anyqtalǵan joq, — dedi ıÝrıı Zalygın.
Profılaktıka halyqty qorǵaýdyń negizgi quraly bolyp qala beredi. Erekshe nazar aýmaqtardy óńdeýge, monıtorıng júrgizýge jáne azamattardy saqtyq sharalary týraly aqparattandyrýǵa aýdaryldy.
Departamentte vaktsınatsııa máselesi de túsindirildi: Qaraǵandy oblysy kene entsefalıti boıynsha endemııalyq aımaqqa jatpaıdy, sondyqtan josparly vaktsınatsııa júrgizilmeıdi. Alaıda endemııalyq óńirlerge baratyn turǵyndar medıtsınalyq uıymdarda aqyly negizde vaktsına ala alady.
Mamandar kene anyqtalǵan jaǵdaıda travmpýnktke júginýge nemese ony pıntset ne jip kómegimen ózdiginen abaılap alyp tastaýǵa, shaqqan jerdi antıseptıkpen óńdeýge jáne keneni zerthanalyq tekserý úshin saqtap qoıýǵa keńes beredi. Sondaı-aq 14 kún boıy densaýlyq jaǵdaıyn baqylaý mańyzdy.
Dárigerler keneni maımen nemese vazelınmen maılaýǵa bolmaıtynyn eskertedi, sebebi bul ınfektsııa juqtyrý qaýpin arttyrady. Aldyn alý úshin jabyq, ashyq tústi kıim kııý, repellentter qoldaný jáne serýen kezinde deneni jıi tekserip turý usynylady. Endemııalyq aımaqtarǵa sapar shekkende mamandar aldyn ala epıdemıologııalyq jaǵdaıdy naqtylap, qajet bolsa vaktsınatsııadan erterek ótýdi usynady.
Aıta keteıik, bıyl elimizde kene belsendiligi ádettegiden erte bastaldy. Qazir Almaty óńirinde kene shaǵý órship tur.
