Qaraǵandynyń ortalyǵynda ǵımarat opyrylyp túsip, 15 jumysshy evakýatsııalandy

QARAǴANDY. KAZINFORM — Qaraǵandyda bos turǵan ǵımarat opyrylyp túsip, jóndeý jumystaryn júrgizip jatqan 15 adam qaýipsiz jerge shyǵaryldy. Zardap shekkender joq.

Oqıǵa 29 shilde kúni saǵat 15:45 shamasynda Qazybek bı aýdanyndaǵy Erýbaev kóshesinde ornalasqan tórt qabatty bos turǵan ǵımaratta boldy. Nysan — burynǵy ATF bankiniń ǵımaraty.

— Aldyn ala málimet boıynsha, ǵımarattyń shatyryndaǵy aǵash qańqasy, úshinshi qabattan birinshi qabatqa deıingi aralyqtaǵy tóbe jabyndylary, syrtqy qabyrǵa men baspaldaq marshy qulaǵan. Opyrylyp túsken aýmaqtyń jalpy aýdany shamamen 150 sharshy metrdi quraıdy. Qaraǵandy oblystyq tótenshe jaǵdaılar departamentiniń mamandary ǵımarat ishinen 15 adamdy — jóndeý brıgadasynyń qyzmetkerlerin evakýatsııalady. Jedel júrgizilgen tekserý nátıjesinde úıindi astynda qalǵan adamdardyń joqtyǵy anyqtaldy. Zardap shekkender tirkelgen joq, — delingen habarlamada.

Qazirgi ýaqytta oqıǵanyń naqty sebepteri anyqtalyp jatyr.

Eske salsaq, Mańǵystaýda mekteptiń tóbesi opyrylyp, atalmysh derek boıynsha qylmystyq is qozǵalǵan edi.