Qaraǵandynyń Qarqaraly aýdanyndaǵy órtti sóndirýge tikushaq jumyldyryldy
QARAǴANDY. KAZINFORM — Kúrdeli taýly jer bederi men qatty jel Qarqaraly aýdanyndaǵy tabıǵı órtti sóndirý jumystaryn qıyndatyp otyr. Barýy qıyn ýchaskelerdegi órt oshaqtaryn sóndirýge avıatsııa tartyldy.
Qarqaraly aýdanynda qutqarýshylar jete almaıtyn aýmaqtaǵy tabıǵı órtti sóndirýge Qazaqstan TJM-niń «Qazavıaqutqarý» tikushaǵy jumyldyryldy. Sý tógetin qurylǵymen jabdyqtalǵan áýe kemesi Mataq jáne Jaıma aýyldary mańyndaǵy órt oshaqtaryna tórt ret sý shashyp, sóndirý jumystaryn júrgizdi.
Qaraǵandy oblysynyń TJD málimetinshe, Mataq aýyly mańyndaǵy órt oqshaýlandy.
Sonymen qatar Janatoǵan aýyly mańyndaǵy taýly-dalaly aýmaqtaǵy taǵy bir tabıǵı órt te oqshaýlandy. Qazir oqıǵa ornynda órt saldaryn joıý jumystary jalǵasyp jatyr. Órtti sóndirýge 153 adam men 51 tehnıka jumyldyrylǵan. Quramynda TJM kúshteri, jergilikti atqarýshy organdardyń qyzmetkerleri jáne erikti jasaqtar bar.
Órtke qarsy jumystardy qatty jel jáne adam men tehnıka jete almaıtyn taýly aımaqtar kúrdelendirip otyr.
TJD málimetinshe, eldi mekenderge qaýip joq. Jaǵdaı turaqty baqylaýda. Órt oshaqtary tolyq joıylǵanǵa deıin sóndirý jumystary jalǵasady.
Eske sala keteıik, buǵan deıin Qarqaraly aýdanyndaǵy órt kezinde eki adamdy kúıik shalǵany habarlanǵan bolatyn.
