Qaraǵandynyń burynǵy ákiminiń uly qart anasyn urǵany úshin bas bostandyǵynan aıyryldy

ASTANA. KAZINFORM — Qaraǵandy qalasynyń Qazybek bı aýdandyq sotynda 78 jastaǵy keıýanany uryp-soqqan er adamǵa qatysty is qaraldy. Burynǵy qala ákiminiń uly qart anasyna qol kótergeni úshin úsh jylǵa bas bostandyǵynan aıyryldy.

Sotqa deıingi tergep-tekserý organdary aıyptalýshy 1946 jyly týǵan anasyna qasaqana dene jaraqatyn salǵany, densaýlyǵyna ortasha aýyrlyqtaǵy zııan keltirgeni jáne dármensiz kúıde bolǵan qarııaǵa qatysty qylmys jasaǵany úshin QK 107-baby 2-bóligi 3-tarmaǵy boıynsha aıyp taqty. 

Belgili bolǵandaı, er adam úıinde otyryp, anasymen janjaldasyp, ashýǵa býlyqqan kúıi keıýanynyń basy men denesin judyryqtap, aıaǵymen tepkilegen. Saldarynan qarııa jabyq bas-mı jaraqatyn alǵan: mıdyń shaıqalýynyń ótkir kezeńi, oń kóz orbıtasynyń búıir qabyrǵasynyń synýy, oń jaq betsúıek doǵasynyń synýy, oń jaq gaımor qýysynyń aldyńǵy jáne artqy qabyrǵalarynyń synýy, gemosınýs damýy, bettiń kógerýi; oń jaqtaǵy keýde qýysynyń jabyq jaraqaty, 3, 4, 5, 6 qabyrǵalarynyń synýy; birinshi bel omyrtqasynyń jabyq, asqynbaǵan kompressııalyq synýy tirkelgen.

Qatygezdiń kinási jábirlenýshiniń, kýáger bolǵan kórshilerdiń aıǵaqtarymen, saraptamalardyń qorytyndylarymen jáne istiń basqa da materıaldarymen dáleldendi.

Prokýror aıyptalýshyǵa 3 jylǵa bas bostandyǵynan aıyrý jazasyn taǵaıyndaýdy jáne talap-aryzdardy tolyq qanaǵattandyrýdy surady.

Al qorǵaýshy tarap bas bostandyǵynan aıyrmaıtyn jeńildeý jaza taǵaıyndaýdy suraǵan bolatyn.

Alaıda sot onyń jeke basyn, kináni jeńildetetin jáne aýyrlatatyn jaǵdaılardyń joqtyǵyn, sondaı-aq kinásin moıyndamaǵanyn jáne jasaǵan isine ókinbegenin, jaqyn adamyna — óz anasyna dene jaraqatyn salǵanyn eskere otyryp, bul bap boıynsha qatal jaza kesýdi sheshti.

«Ý.-ǵa 2024 jylǵy 23 qyrkúıektegi sot úkimimen ortasha qaýipsizdik qylmystyq-atqarý júıesi mekemesinde 3 jyl merzimge bas bostandyǵynan aıyrý jazasy taǵaıyndaldy. 

Talap-aryzdar tolyq qanaǵattandyrylyp, 1 000 000 teńge kóleminde moraldyq zııandy óteý somasy, sondaı-aq advokattarǵa tólengen shyǵyndar óndirildi», — dep málimdedi Qaraǵandy qalasy Qazybeń bı aýdandyq sotynyń baspasóz qyzmeti.

Sot úkimi zańdy kúshine engen joq.