Qaraǵandynyń aýmaǵy 281 gektarǵa ulǵaıady
QARAǴANDY. KAZINFORM – Úkimet Qaraǵandy qalasynyń ákimshilik shekarasyn ózgertý týraly sheshimdi maquldady. Soǵan sáıkes oblys ortalyǵynyń quramyna Buqar jyraý aýdanynan jalpy aýmaǵy 281 gektar jer ýchaskesi qosylady.
— Kókpekti stansasynyń (burynǵy Solonıchkı) turǵyndary eldi mekendi tolyqtaı Qaraǵandy qalasynyń qaramaǵyna berýdi kópten beri surap kelgen. Buǵan deıin turǵyn úıler Qaraǵandy qalasynyń Álıhan Bókeıhan atyndaǵy aýdanyna qarasa, qalǵan jer aýmaǵy Buqar jyraý aýdanynyń quramynda bolǵan. Kókpekti stansasynda 500 adam turady, 120 aýla men mektep bar, — delingen habarlamada.
Qala aýmaǵyn keńeıtý Qaraǵandynyń odan ári damýyna qolaıly jaǵdaı jasaýǵa, aýmaqty tıimdi josparlaýǵa jáne áleýetti ınfraqurylymdyq jobalardy iske asyrýǵa baǵyttalǵan.
Ákimshilik shekaranyń ózgerýi qalalyq ortany keshendi damytýǵa múmkindik berip, jańa nysandar salýǵa, sondaı-aq ınjenerlik jáne áleýmettik ınfraqurylymdy odan ári damytýǵa jol ashady.
Aıta ketelik «Jezqazǵan – Qaraǵandy» tasjoly qaıta jańartylyp, joba aıasynda 20 kópir salynady.
