Qaraǵandyny kógaldandyrý isi sotqa deıin jetip, daýǵa aınaldy
QARAǴANDY. KAZINFORM - Qaraǵandyda ótemaqy retinde aǵash otyrǵyzýǵa qatysty kóp jyldan beri jalǵasyp kele jatqan daý jańa sıpat aldy. Sot bul iste qurylys kompanııasynyń áreketterinen quqyq buzýshylyq quramyn tappaǵanymen, qala áli kúnge deıin kesilgen aǵashtardyń ornyna egilýi tıis myńdaǵan kóshetti kútip otyr.
7200 aǵashqa qatysty janjal eki jyl buryn bastalǵan. Sol kezde «Gúlder» shaǵynaýdanynda turǵyn úı keshenin salý barysynda shamamen 140 aǵash kesilgen bolatyn. Qazybek bı aýdandyq ákimdiginiń málimetinshe, qurylys salýshynyń jasyl jelekterdi kesýge ruqsat qujattary bolmaǵan.
Sot talqylaýlarynan keıin PROF INVEST kompanııasy keltirilgen zalaldy ótep, ótemaqy retinde 7200 aǵash egýge mindetteldi. Alaıda arada uzaq ýaqyt ótse de, bul mindetteme oryndalmaı otyr. Belgilengen aýmaqta jańa terek, qaıyń jáne shyrsha kóshetteri áli egilmegen.
Qalalyq ákimdik sot sheshimi tolyq kólemde oryndalýy tıis ekenin alǵa tartady.
– Zańsyz túrde shamamen 140 aǵash kesildi. Kompanııa bul jumystardy júrgizýge eshqandaı ruqsat almaǵan. Sot sheshimine sáıkes, PROF INVEST 7200 aǵash egýge mindetti. Egilgen kóshetter sanyn azaıtý múmkin emes. Sebebi dál osyndaı kólemdegi ótemaqy sot aktisimen belgilengen, – dedi Qaraǵandy qalasy Qazybek bı aýdany ákiminiń orynbasary Dıdar Qabaev.
Bastapqyda kóshetterdi Saryarqa kóshesindegi «Alash» gúlzaryna otyrǵyzý josparlanǵan bolatyn. Alaıda jobany iske asyrý merzimi taǵy da keıinge shegerildi. Qurylys kompanııasynyń ókilderi keshigýdi jumystardyń barlyq kezeńin qala bıligimen kelisý qajettiligimen túsindiredi. Onyń ishinde otyrǵyzý orny, ornalasý syzbasy jáne ákimdik mamandarynyń baqylaýy bar.
Osy arada memlekettik sot oryndaýshylary kompanııa zańdy kúshine engen sot sheshimin oryndamaı otyr degen qorytyndy jasap, qurylys salýshyny ákimshilik jaýapkershilikke tartý máselesin kóterdi.
Alaıda kompanııa bul ustanymmen kelispeıdi. PROF INVEST ókilderiniń aıtýynsha, taraptar arasynda mindettemelerdi oryndaý tártibin aıqyndaıtyn bitimgershilik kelisim jasalǵan.
– Sot sheshimi oryndalmady degen másele nege týyndady? Sebebi taraptar arasynda bitimgershilik kelisim bar. Onyń somasy 25 mıllıon teńge. Kompanııa osy qarajat kóleminde aǵash otyrǵyzý jumystaryn oryndaýy tıis, al ákimdik nátıjeni qabyldaýy qajet. Kelisim buzylǵan joq jáne zańdy kúshinde tur. Sondyqtan jaýapkershilikke tartý týraly máseleni kóterý ázirge erte dep sanaımyz, – dedi kompanııa ókili Gúlzat Alpysova.
Kompanııa ókilderi keshigýdiń tek ózderine baılanysty emes ekenin de atap ótti. Olardyń aıtýynsha, jumystardy bastaý úshin ýákiletti organdardyń kelisimi qajet.
Daý Qaraǵandy qalasynyń Mamandandyrylǵan aýdanaralyq ákimshilik quqyq buzýshylyqtar jónindegi sotyna deıin jetti. 2026 jylǵy 16 maýsymda sot PROF INVEST JShS-ne qatysty sot aktisin oryndamaý faktisi boıynsha isti qarady.
Sot anyqtaǵandaı, memlekettik sot oryndaýshysy 7200 aǵash otyrǵyzý jónindegi sheshimniń oryndalmaýyna baılanysty ákimshilik hattama jasaǵan. Alaıda sot talqylaýy barysynda kompanııanyń óz mindettemelerin oryndaýǵa áreket jasaǵany belgili boldy. Atap aıtqanda, ol birneshe ret ákimdikke dendrologııalyq jospardy, otyrǵyzý syzbasyn jáne ózge de qajetti kelisimderdi alý úshin júgingen.
Sot sondaı-aq taraptar arasynda sot sheshimin oryndaý tártibine qatysty uzaqqa sozylǵan daýdyń bar ekenin atap ótti. Daýly máseleler qatarynda aǵash otyrǵyzatyn oryndy tańdaý, aǵash túrlerin anyqtaý jáne olardy qabyldaý rásimi bolǵan.
Nátıjesinde sot kompanııa áreketterinen sot aktisin oryndaýdan ádeıi jaltarý belgilerin anyqtamady jáne ákimshilik quqyq buzýshylyq quramynyń bolmaýyna baılanysty is júrgizýdi toqtatty.
Sonymen qatar sot qaýlysy ázirge zańdy kúshine engen joq.
Qurylys salýshy men qala bıligi mindettemelerdi oryndaý tártibin áli de talqylap jatqan ýaqytta Qaraǵandy ýáde etilgen 7200 aǵashsyz qalyp otyr. Qala turǵyndary úshin bul másele áldeqashan sot protsesteriniń aıasynan shyǵyp ketken.
Aıta keteıik, Almatyda jyl basynan beri 105 aǵash qulady.
