Qaraǵandylyqtar qymyz pisken ájeıdiń úsh metrlik músinin jasady

ASTANA. KAZINFORM — Qaraǵandy oblysynyń sheberleri halyqaralyq festıvalde qymyz pisip otyrǵan ájeıdiń úsh metrlik músinin jasap shyǵardy, dep habarlaıdy oblys ákimdiginiń baspasóz qyzmeti.

Shymkentte ótken halyqaralyq aǵash kesý festıvaline Qazaqstan, Ózbekstan, Qyrǵyzstan, Mońǵolııa, Reseı jáne Belarýs elderiniń sheberleri qatysty. Qaraǵandy oblysynyń namysyn Áýbákir Ismaılov atyndaǵy balalar kórkemsýret mektebiniń oqytýshylary Ersin Temirǵalıev pen Jańabek Jumabekov biriktirgen Shahtınsk qalasynyń «Saryarqa-Qarakesek» dýeti qorǵady. Olar ulttyq stılde úsh metrlik músin jasap, tutas balqaraǵaı aǵashynan jasalǵan kúbidegi qymyzdy pisip turǵan qart áıeldi kesip jasady.

— Biz aǵashtan oıý-órnek oıýmen burynnan aınalysyp kelemiz, biraq buǵan deıin tek usaq nárseler bolatyn. Aýqymdy jumysqa alǵash ret 2024 jyly Altaıdaǵy festıvalde kiristik. Bizdiń komanda sol jerde quryldy. Buǵan deıin tek keskindeme festıvaline qatysqan edik. Qysta biz muzdan fıgýralar jasaımyz. Keıde bizge betonnan jasalǵan shaǵyn pishinderge tapsyrys túsedi, — dedi Ersin Temirǵalıev.

Bul joly qymyz — bıe sútinen jasalǵan ulttyq sýsyndy kúbide pisip otyrǵan qart áıeldiń beınesin tańdaý týraly sheshim qabyldaǵan. Ideıa — qazaqtyń qonaqjaılylyq dástúrlerin kórsetý. Ulttyq oıý-órnekter de umyt qalmady, olardy kımeshek pen kúbige oıyp jasaǵan. Saýsaqqa áshekeı — iri saqına qosyldy.

Uıymdastyrýshylar men basqa da sýretshiler Shahtınsk sheberleriniń jumys sapasy men kúrdeliligin atap ótti. Shara sońynda festıval qatysýshylaryna dıplomdar men aqshalaı syılyqtar tabys etildi.

Budan buryn Ertis boıynda tigilgen alyp kımeshek halyqaralyq rekordtar kitabyna engenin jazǵanbyz.