Qaraǵandylyq taý-ken qutqarýshylary shahtadaǵy qaýipti jaǵdaı týraly shyndyqty aıtty

Qaraǵandy oblysynyń taý-ken qutqarýshylary qaıǵyly oqıǵa bolǵan kúni taǵy bir apattyń aldyn alǵan. Bul týraly olar áleýmettik jelilerde jarııalanǵan beınematerıalda aıtady, dep habarlaıdy Kazinform. 

«Biz ol jerge saǵat 4-te bardyq (apat saǵat 2:33-te boldy - red.). Bizdi jarylystan keıingi jaǵdaıdy barlaýǵa jiberdi. Ne boldy, jaǵdaı qandaı, taǵy basqasyn anyqtaýǵa. Qarap júrgen kezimizde órt oshaǵyna tap boldyq. Órt sóndirgish taýyp alyp, sóndirýge kiristik. Apattyq ýchaskedegi birinshi qıyndyq ýly gaz taralýy jáne sýdyń joqtyǵy boldy. Jarty saǵat sý izdeýmen júgirdik. Bul – birinshi ret bolyp turǵan jaıt emes, ıaǵnı másele qazir baqylaýdyń osaldyǵynda», - deıdi Vadım esimdi qutqarýshy.

Aıtýynsha, olar bir-eki saǵat keshikkende Kostenko shahtasynda taǵy bir jarylys bolýy múmkin edi.

«Eger shahtada shoǵyrlanǵan tozań jarylǵanda onyń aýqymy óte úlken bolar edi», - deıdi ol.

Qutqarýshylar qaýipti jaǵdaı týraly eskertýlerden keıin shahtadaǵy óndiris toqtatylýy kerektigin aıtady. Buryn solaı bolǵan, al qazir ýchaskelerden baıqap, tizip bergen eskertýlerdiń jartysy joq bolyp ketetinine qynjylady.

«Bizdiń bastapqy mindetimiz – jarylystyń aldyn alý. Tekserip qaraımyz, bárin jazyp beremiz. Biraq, eskertýlerdiń jartysy joq bolyp ketedi. Nege? Sebebi, «Arselor» kelisimshartty buzady degen qorqynysh bar. Biz – taý-ken qutqarýshylarymyz, biraq qazir ózimizdiń ne istep, ne qoıyp júrgenimizdi, kimge baǵynatynymyzdy bilmeı qaldyq. Jumysymdy qatty jaqsy kóremin, alaıda osy jumysym úshin uıalatyn kúıge tústim», - dep kúıinedi Aleksandr Grıgorev.

Olar «bar másele qutqarý qyzmetiniń jekeshelenip ketýinde» dep esepteıdi. Sondyqtan da shyndyqty ashyp aıtýǵa bel býǵan.

Eske salsaq, 28 qazan saǵat 2:33-te Qaraǵandy oblysyndaǵy Kostenko atyndaǵy shahtada apat boldy. Qaraǵandy oblysynyń ákimi Ermaǵanbet Bólekpaev áleýmettik jelidegi paraqshasynda habarlaǵanyndaı, apat kezinde shahtada 252 adam bolǵan, jer betine 205 shahter shyǵaryldy.

Qazaqstan Prezıdenti Qasym-Jomart Toqaev qaza tapqan kenshilerdiń týǵan-týystary men jaqyndaryna kóńil aıtyp, zardap shekkenderdiń tezirek saýyǵyp ketýin tiledi. Úkimetke kenshilerdiń otbasylaryna barlyq qajetti kómek kórsetýdi, sondaı-aq «ArselorMıttalTemirtaý» kompanııasymen ınvestıtsııalyq yntymaqtastyqty toqtatýdy tapsyrdy.

Shahtadaǵy órt faktisi boıynsha Qylmystyq Kodekstiń 277-babynyń 3-bóligi «Taý-ken nemese qurylys jumystaryn júrgizý kezinde qaýipsizdik qaǵıdalaryn buzý» baby boıynsha sotqa deıingi tergep-tekserý bastaldy. 

Memleket basshysynyń tapsyrmasyna sáıkes Premer-Mınıstr Álıhan Smaıylovtyń tóraǵalyǵymen apattyń sebepterin tergeý jáne onyń saldaryn joıý jónindegi Úkimettik komıssııa quryldy. Sondaı-aq, Úkimet «ArselorMıttal Temirtaý» AQ aktsıonerlerimen aldyn ala ýaǵdalastyqqa qol jetkizgeni jáne kásiporynnyń menshik quqyǵyn Qazaqstan Respýblıkasynyń paıdasyna berý týraly kelisimshartty rásimdeý aıaqtalý ústinde ekendigi habarlandy.

Memleket basshysy Qasym-Jomart Toqaev apattyń mán-jaıyn anyqtap, tıisti sheshim qabyldaý úshin Qaraǵandy oblysyndaǵy qaıǵyly oqıǵa bolǵan jerge bardy. Qaza tapqan kenshilerdiń otbasylarymen jáne týǵan-týystarymen kezdesip, kóńil aıtty. Apattyń mán-jaıyn anyqtaý, kenshilerdi qutqarý jáne zardap shekkender men qaza tapqandardyń otbasylaryna shuǵyl kómek kórsetýge qajetti sharalar qabyldanatynyn jetkizdi. Shahtada bolǵan apat saldaryn joıý jónindegi jedel shtab otyrysyn ótkizdi. 29 qazandy jalpyulttyq aza tutý kúni etip jarııalaıtyn Ókimge qol qoıdy. 

Búgin Kostenko shahtasynda qaza bolǵan 46 kenshiniń aty-jóni jarııalandy.