Qaraǵandylyq sýretshi Káripbek Kúıikovtiń kartınalary Nıý-Iork kórermenderin tánti etti
ASTANA. KAZINFORM - Nıý-Iork qalasyndaǵy BUU shtab-páterinde ıadrolyq qarýǵa tyıym salý týraly shartqa qatysýshy memleketterdiń konferentsııasy ótti. Sharaǵa Qaraǵandy oblysynyń delegatsııasy da qatysty.
Halyqaralyq konferentsııa barysynda qatysýshylar nazaryna Qaraǵandy oblysy Semeı ıadrolyq polıgonynyń qurbany, álemge áıgili sýretshi Káripbek Kúıikovtyń sýretteriniń kórmesin jáne tarıhı-ólketaný mýzeıiniń qorlarynan «Polıgon jańǵyryǵy» atty fotokórme usyndy.
-Bizdiń otanymyzdyń ónerin BUU sııaqty mańyzdy halyqaralyq tuǵyrnamada tanystyrý biz úshin úlken mártebe. Biz shyǵarmashylyq pen óner arqyly beıbitshilik pen turaqtylyqtyń mańyzdylyǵy týraly, jahandyq qaýipsizdikti qoldaýdaǵy árbir adamnyń róli týraly myqty habarlama jetkizýge bolatynyna senimdimiz, - dep atap ótti Qaraǵandy oblysynyń mádenıet, arhıvter jáne qujattama basqarmasynyń basshysy Erkebulan Jumakenov.
ıAdrolyq qarýdy taratpaý jónindegi konferentsııa úkimet ókilderin, ǵalymdardy, belsendiler men azamattyq qoǵam ókilderin qosa alǵanda, álemniń túkpir-túkpirinen júzdegen delegattardy jınaıtyn álemdik arenadaǵy mańyzdy oqıǵa bolyp tabylady.
Qaraǵandy oblysynyń sýretter kórmesi qatysýshylardyń nazaryn tek tehnıkalyq máselelerge ǵana emes, sonymen qatar beıbitshilikti saqtaý jónindegi jahandyq kúsh-jigerdiń gýmanıtarlyq quramdas bólikterine de aýdardy.
Káripbek Kúıikov sýretteriniń kórmesi, sondaı-aq murajaı qorlaryndaǵy fotokórme konferentsııa bastalǵannan sońǵy kúnge deıin jumys istep, delegattar men halyqaralyq uıymdar ókilderiniń nazaryna qoljetimdi boldy.
Kórmege kún saıyn 100-den astam adam kelip, olardyń árqaısysy Káripbek Kúıikovtiń rýhyna, sondaı-aq Qazaqstannyń ıadrolyq qarýdy taratpaý qozǵalysyna qosqan erekshe úlesine tánti boldy.
Káripbek óz óneriniń arqasynda álemdegi beıbitshilik pen ıadrolyq qarýmen kúrestiń sımvoly bolyp tabylady. Onyń óneri jaı ǵana sýret emes, bul kúres, úmit, beıbit ómirge umtylý, dep atap ótti Qaraǵandy oblysy mádenıet basqarmasynda.
Osyǵan deıin Abaı oblysynda buryn Semeı ıadrolyq polıgony bolǵan keı jerler áli kúnge deıin qoldanysqa berilmeı otyrǵany jaıly jazǵan bolatynbyz.
