Qaraǵandylyq shahmatshy Úndistanda ótken álem chempıonatynda úsh medal jeńip aldy

QARAǴANDY. KAZINFORM – Qaraǵandynyń 20 jastaǵy turǵyny Álimjan Aıapov tirek-qımyl apparaty buzylǵan sportshylar arasyndaǵy shahmattan álem chempıonatynda úsh nomınatsııada júldeger atandy.

Chempıonat Úndistannyń Goa shtatynda, Panadjı qalasynyń Dona-Paýla aýdanynda ornalasqan halyqaralyq shahmat ortalyǵynda ótti. Baıraqty básekede 15 eldiń atynan 89 sportshy baq synady.

Qazaqstan ulttyq quramasynyń sapynda óner kórsetken qaraǵandylyq Álimjan Aıapov úsh birdeı baǵdarlamada júldeli orynnan kórindi.

– Blıtste 20 jasqa deıingi jastar sanatynda Álimjan toǵyz upaıdyń altaýyn jınap, kúmis medal ıelendi. Ol tek byltyrǵy chempıon, Belarýs eliniń ókili Mıhaıl Denısenge ese jiberdi. Rapıdte alty jeńis, eki teń oıyn jáne bir jeńilispen erler arasynda ekinshi oryndy enshiledi.

Al klassıkalyq shahmatta toǵyz partııadan jeti upaı jınap, eresekter arasyndaǵy sanatta qola medal jeńip aldy, – dedi sportshynyń bapkeri Vıktor Maksımenko.

Álem chempıonatyna Qazaqstannan tórt sportshy qatysty.

Resmı emes komandalyq esepte otandyq shahmatshylar Reseı men Úndistannan keıin úshinshi orynǵa taban tiredi. Qurama qorjynynda bes kúmis pen eki qola medal bar, onyń basym bóligin Álimjan Aıapov enshilegen.

Osyǵan deıin Prezıdent shahmatshy Merýert Kamalıdenovany FIDE World Cup 2025 jarysyndaǵy jetistigimen quttyqtany týraly jazǵan bolatynbyz.