Qaraǵandylyq polıtseıler qalaaralyq joldarda jazǵy dóńgelegin aýystyrmaǵan júrgizýshilerdi keri qaıtaryp jatyr
QARAǴANDY. KAZINFORM — Kúnniń sýytýy men kóktaıǵaqqa baılanysty Qaraǵandy oblysynyń polıtseıleri joldaǵy baqylaýdy kúsheıtti. Oblys trassalarynda qosymsha ekıpajdar qyzmet atqaryp jatyr, al jazǵy dóńgelegin aýystyrmaǵan kólikterge ýaqytsha jolǵa shyǵýǵa tyıym salyndy.
Aýa temperatýrasynyń kúrt tómendeýi men jańbyr aralas qardyń jaýýyna baılanysty Qaraǵandy oblystyq polıtsııa departamentiniń patrýldik polıtsııa batalony kúsheıtilgen qyzmet rejımine kóshti. Bul sharalar jolaýshylardyń qaýipsizdigin qamtamasyz etýge, oblystyq jáne respýblıkalyq mańyzy bar trassalarda apatty jaǵdaılardyń aldyn alýǵa baǵyttalǵan.
Joldaǵy baqylaýdy kúsheıtý úshin polıtsııa ekıpajdarynyń sany artty. Búgin respýblıkalyq mańyzy bar trassalarǵa 26 avtopatrýl men 55 polıtsııa qyzmetkeri jumyldyrylǵan. Olar júrgizýshilermen profılaktıkalyq áńgime júrgizip, jyldamdyq rejımin saqtaý, araqashyqtyqty saqtaý jáne kólikterdiń tehnıkalyq jaǵdaıyn qysqy maýsymda qadaǵalaý qajettigin eske salyp jatyr.
Erekshe nazar Qaraǵandy — Astana tas jolyna aýdaryldy. Munda patrýldik polıtsııa qyzmetkerleri kólikterdiń qysqy dóńgelekke aýystyrylǵan-aýysyrylmaǵanyn tekserip jatyr.
Qaraǵandy oblystyq polıtsııa departamenti patrýldik polıtsııa batalonynyń komandıri Medet Nurmuhanovtyń aıtýynsha, búgin shamamen 30 júrgizýshi jazǵy shınalarmen júrgeni úshin jolǵa shyǵarylmaǵan.
— Jol qozǵalysy qaýipsizdigin qamtamasyz etý maqsatynda qysqy dóńgelekke aýystyrylmaǵan kólikterdiń jolǵa shyǵýyn ýaqytsha shektep otyrmyz. Bul — formaldy shara emes, júrgizýshiler men jolaýshylardyń ómiri men densaýlyǵyn saqtaý úshin qabyldanǵan naqty sheshim. Eger keshe jańbyr jaýǵan bolsa, búgin aýa temperatýrasy –14 gradýsqa deıin tómendep, keıbir ýchaskelerde kóktaıǵaq boldy. Barlyq júrgizýshilerden túsinistikpen qaraýdy suraımyz, — dep atap ótti Medet Nurmuhanov.
Keshe keshten beri oblys ortalyǵynda 50-ge jýyq usaq jol-kólik oqıǵasy tirkelgen. Negizgi sebepteri — jyldamdyq rejımin jáne araqashyqtyqty saqtamaý, sondaı-aq jazǵy dóńgelekpen júrý. Bul jaǵdaıda zardap shekkender joq.
Polıtsııa departamenti júrgizýshilerge aýa raıy jaǵdaıyn eskerip, jolda muqııat bolýǵa jáne asa qajetsiz jaǵdaıda saparǵa shyqpaýǵa keńes beredi.
Eske salsaq, 4 qarasha kúni elimizdiń birqatar óńirinde aýa raıynyń nasharlaýyna baılanysty júrgizýshilerge jolda abaı bolý eskertildi.