Qaraǵandylyq oqýshy SAT halyqaralyq emtıhanynda Qazaqstan rekordyn jańartty

ASTANA. KAZINFORM – Halyqaralyq SAT emtıhanynda Qazaqstan boıynsha eń joǵary nátıje tirkeldi. 

Qaraǵandy qalasynyń túlegi Karım Mýhadıl 1600 baldyń 1590-yn jınap, el tarıhyndaǵy rekordty jańartty. Bul kórsetkish ony álemdegi eń myqty talapkerler qataryna qosyp, jetekshi ýnıversıtetterge túsýge jáne akademııalyq granttar alýǵa múmkindik beredi.

SAT – AQSh pen ózge de elderdiń joǵary oqý oryndaryna túsý kezinde qoldanylatyn standarttalǵan test. Ol tek bilim deńgeıin ǵana emes, sonymen birge taldaý, synı oılaý, mátinmen jumys isteý jáne logıkalyq esepterdi sheshý daǵdylaryn baǵalaıdy. Joǵary ball talapkerdiń konkýrs kezindegi pozıtsııasyn kúsheıtip, stıpendııa taǵaıyndaýǵa negiz bola alady.

Emtıhanǵa Karım Mýhadıl aldyn ala júıeli túrde daıyndalǵan – ol daıyndyqty 11-synyptan bastap, shetelde bilim alýdy maqsat etken. Sonymen qatar oqýshy halyqaralyq zııatkerlik jarystarda da joǵary nátıje kórsetti: jasandy ıntellekt boıynsha Fizmat AI Olympiad olımpıadasynyń qola júldegeri atandy, sondaı-aq baǵdarlamalaý men ІT baǵyttary boıynsha Infomatrix Asia baıqaýynda qola medal jeńip aldy.

Bolashaq stýdent naqty qaı ýnıversıtetti tańdaıtynyn áli sheshken joq. Basym baǵyttardyń qatarynda AQSh, Eýropa elderi, Gonkong pen Ońtústik Koreıa bar. Ol jasandy ıntellekt pen ınformatıka salasyndaǵy baǵdarlamalar boıynsha bilim alýdy josparlap otyr. Qazirgi tańda Karım Qaraǵandydaǵy Nazarbaev Zııatkerlik mektebiniń oqýshysy.

Aıta keteıik, buǵan deıin 116 myńnan astam oqýshy kásibı baǵdarlaý testileýinen ótkeni habarlanǵan bolatyn.