Qaraǵandylyq mýzykant avtorlyq tregi úshin «Altyn dısk» ıegeri atandy
ASTANA. KAZINFORM –21 jastaǵy qaraǵandylyq Arystan Ábildın «Sen jalǵyzsyń» áni úshin «Altyn dısk» ıegeri atandy. Jas mýzykant bul ándi súıiktisine arnaǵan.
Arystan Ábildın jastar arasynda «Colorit» laqap atymen tanymal. Qazir jigit Almatydaǵy Qurmanǵazy atyndaǵy Qazaq ulttyq konservatorııasynyń 2 kýrs stýdenti. Ol «Sen jalǵyzsyń» ánin qaraǵandylyq qyzyna arnady.
«Ol ózin jarııalaǵandy asa unatpaıdy, sondyqtan onyń esimin aıta almaımyn. Biraq men bir nárseni aıtaıyn: ol meni tek osy trek úshin ǵana emes, basqa da kóptegen jumystar úshin shabyttandyrdy. Jalpy, meniń repertýarymda 15 án bar. Tregimniń mıllıondaǵan taralymy men qaralymy úshin «Altyn dısk» aldym. Bul dybys jazý salasynda moıyndalǵanymdy bildiredi», - deıdi Arystan.
Arystan mýzykanttar otbasynda dúnıege kelgen. Anasy dırıjer, al ákesi mýzyka mektebin basqardy. Jas mýzykant birneshe mýzykalyq aspaptarda oınaıdy, án aıtyp, shoý-ındýstrııanyń ár salasynda ózin synap júr. 2022 jyly onyń hıt áni 45 mıllıon ret tyńdalyp, «platına dıskisin» aldy.
«Men álemdik sahnaǵa shyǵyp, qazaq áýenderi men óz ánderimdi afrıkalyq urmaly aspaptardy paıdalana otyryp, tyńdarmanǵa jetkizýdi armandaımyn. Ásirese, marımbanyń dybysy unaıdy. Qazaq oryndaýshylarynyń ishinde rýhanı qundylyqtary jaǵynan maǵan Dımash Qudaıbergen jaqyn. Maǵan onyń qarapaıymdylyǵy, zerdeliligi unaıdy. Sondaı-aq M’Dee, Igor Krýtoı, Brýno Mars jáne The Weeknd jumystaryna tántimin», - deıdi mýzykant.
«Altyn dısk» Arystannyń bıylǵy jalǵyz jeńisi emes. Jaqynda ol TMD elderiniń atynan shyqqan TikTok platformasyndaǵy baıqaýǵa qatysty. Ol uly Abaıdyń «Kózimniń qarasy» ánimen «Jáı ǵana kúl» ánine túsirilgen beınebaıandy aralastyryp, birinshi oryndy jeńip aldy.
