Qaraǵandylyq kásipkerler qarjy vıtse-mınıstrimen salyq reformalaryn talqylady
ASTANA. KAZINFORM – Qaraǵandyda Qarjy vıtse-mınıstri Dáýren Temirbekovtiń Qaraǵandy oblysynyń kásipkerlerimen kezdesýi ótti. Basty maqsat – salyq reformalaryn talqylaý.
Premer-mınıstr Oljas Bektenovtyń tapsyrmasy boıynsha Úkimet músheleri «Atameken» UKP ókilderimen birge óńirlerdi aralap, kásipkerlermen salyq saıasaty boıynsha pikir almasýda.
Kezdesý barysynda qarjy vıtse-mınıstri Dáýren Temirbekov QQS-tyń dıfferentsıaldy mólsherlemeleri boıynsha Úkimet usynystaryn málimdedi.
«QQS-tyń jalpy mólsherlemesin 16% deńgeıinde belgileý usynylady. Sonymen qatar aýyl sharýashylyǵy óndirýshilerin bul salyqtan tolyǵymen bosatý kózdelýde. Keıbir salalar úshin aralyq mólsherleme – 10% belgilenbek. Osylaısha, usynylyp otyrǵan salyq dıfferentsıatsııasy: 16%, 10%, 0% – salyqtan tolyq bosatý», — dedi vıtse-mınıstr.
Sonymen qatar QQS esebine tirkelý shegi 80 mln teńgeden 15 mln teńgege deıin tómendetý usynyldy.
Kezdesý barysynda salalyq qaýymdastyq ókilderi salyq kodeksine engiziletin ózgerister boıynsha óz pikirlerin bildirdi.
«Ekonomıkalyq turaqtylyq – memlekettik resýrstardy tıimdi basqarýdan, yntalandyrý júıesin qaıta qaraýdan jáne bıýdjettik qarajatty utymdy paıdalanýdan bastalady. Granttardy paıyzsyz nesıelerge aýystyrý qajet, osylaısha qarajat ekonomıkaǵa qaıta oralady», — dedi «Qazaqstandaǵy jeke kásipkerlikti damytýǵa járdemdesý» qaýymdastyǵynyń prezıdenti Vladımır Bykov.
Qaraǵandy oblysynyń qurylys salasy ókilderi atynan «Qurylysshylar qaýymdastyǵy» JK jáne ZT prezıdenti, «ASPAP» ÓK dırektory Tólegen Áshimov sóz sóıledi. Ol ınfraqurylymdyq jobalardy memlekettik-jekemenshik áriptestik (MJÁ) arqyly júzege asyrýdy jáne turǵyn úı qurylys salasyndaǵy salyq saıasatyn qaıta qaraýdy usyndy.
«Salyq kodeksi jobasynda kásipker óz kontragenti memlekettik organdarda tıisti túrde tirkelgen jaǵdaıda, basqa tulǵalardyń salyqtyq jáne ózge de mindettemeleri úshin jaýapkershilikke tartylmaýy tıis degen erejeni qarastyrý qajet», — dep atap ótti Tólegen Áshimov.
Kezdesý barysynda kásipkerler jekelegen salalar men salyqtyq ózgeristerdiń óz qyzmetine yqtımal áserine qatysty kóptegen suraqtar qoıdy. Bıznes-qoǵamdastyq jańa salyq saıasatyn ázirleý kezinde kásipkerlerdiń pikirin eskerý mańyzdy ekenin atap ótti, óıtkeni olar negizgi salyq tóleýshiler bolyp tabylady.
Qorytyndylaı kele, Dáýren Temirbekov barlyq usynystardyń tirkelip, taldanyp, ári qaraıǵy jumysta eskeriletinin málimdedi.
«Biz Qaraǵandy bıznes-qoǵamdastyǵynyń pikiri eskeriledi dep úmittenemiz. QQS jáne onyń tóleý shegine qatysty másele sarapshylardyń, kásipkerlerdiń jáne depýtattardyń pikirin eskere otyryp sheshilýi tıis», — dep atap ótti Qaraǵandy oblystyq kásipkerler palatasynyń dırektory Ernar Kúlpeıisov.
Kezdesý qorytyndysy boıynsha 120 qatysýshy kásipker 120-dan astam usynys bildirdi. Kásipkerler palatasy vıtse-qarjy mınıstrine ashyq dıalog úshin jáne salyq reformasynyń negizgi aspektilerin túsindirgeni úshin alǵysyn bildirdi.