Qaraǵandylyq ǵalymdar erekshe bıoımplanttar ázirlep jatyr
QARAǴANDY. KAZINFORM - Qaraǵandy medıtsınalyq ýnıversıtetinde otandyq ǵylym úshin tyń jobalar júzege asyrylýda. Munda ımplantologııa men hırýrgııa salasyna jańa serpin beretin bıoaktıvti kompozıtter daıyndalyp jatyr.
Olar ımplantologııa men hırýrgııanyń damý baǵytyn ózgertip, zamnaýı tehnologııalardy qazaqstandyqtarǵa qoljetimdi etedi.
Ǵylymı toptyń bastamasymen bıosáıkestigi joǵary polımer-toqymaly kompozıtterdi jasaý jobasy iske qosyldy. Jańa ázirlemeler is júzinde qoldanýǵa baǵyttalǵan. Ásirese, olar tútikti súıekter men bas súıekterine arnalǵan ımplanttar óndirisinde qoldanylmaq.
Zertteýshiler atap ótkendeı, tehnologııanyń basty artyqshylyǵy – addıtıvti óndiris nemese 3D-baspa ádisi. Bul tásil kúrdeli pishinderdi asa joǵary dáldikpen, avtomattandyrylǵan deńgeıde jasaýǵa múmkindik beredi.
Kompozıtterdiń quramyna naqty medıtsınalyq maqsattarǵa beıimdeý úshin túrli qospalardy aralastyrýǵa bolady.
– Bizdiń maqsatymyz – tıimdi ári qoljetimdi, sonymen birge árbir naýqastyń jeke qajettiligine saı beıimdeletin bıoaktıvti materıaldardy óndirýdiń ámbebap ádisin qalyptastyrý, – deıdi joba jetekshisi.
– Adam súıek tinine uqsas kompozıttik qurylymnyń arqasynda mundaı ımplanttar tómen jylýótkizgishtigimen jáne joǵary beriktigimen erekshelenedi.
Joba aıasynda erekshe kóńil 12 jasqa deıingi balalarǵa arnalǵan kranıoplastıkaǵa, sondaı-aq tútikti súıekterdi osteosıntezdeýge qajetti qapsyrma men ımplanttardy ázirleýge bólingen. Barlyq materıaldar olardyń qaýipsizdigi men tıimdiligin dáleldeý úshin keń kólemdi bıologııalyq synaqtardan ótedi.
– Bizdiń ónimderimizdiń barsha qazaqstandyqtarǵa qoljetimdi bolaryna senemiz, – deıdi jobanyń teń jetekshisi.
- Tehnologııanyń qarapaıymdylyǵy men únemdiligi elimizdiń ishki suranysyn tolyq qamtamasyz etýge ǵana emes, sondaı-aq ınnovatsııalyq materıaldardy kórshiles elderdiń naryǵyna shyǵaraýǵa da jol ashady.
Eske salsaq, astanalyq ǵalymdar aýaǵa taraǵan kómirqyshqyl gazyn sińirip alatyn erekshe batpaq oılap tapty.