Qaraǵandylyq fermerlerge 800 mln teńge nesıe beriledi

ASTANA. KAZINFORM – Bıyl Qaraǵandy oblysynda aýyl sharýashylyǵy salasyna salynǵan ınvestıtsııa kólemi eki ese ósken. Jobalardyń jalpy quny – 44 mıllıard teńge. 

Bul týraly oblys ákimi Ermaǵanbet Bólekbaev Ortalyq kommýnıkatsııalar qyzmetinde ótken baspasóz konferentsııasynda málimdedi.

– Agroónerkásip sektorynda jalpy quny 47 mıllıard teńge bolatyn 31 jobany júzege asyrý josparlanǵan. Bul shamamen 300 jańa jumys ornyn ashýǵa múmkindik beredi. Qazirgi tańda quny 26 mıllıard teńge bolatyn 18 joba iske qosyldy, - dedi aımaq basshysy.

Ákimniń aıtýynsha, «Aýyl amanaty» baǵdarlamasy aıasynda aýyl kásipkerlerine 800 mıllıon teńge nesıe beriledi. Al tamaq ónimderi óndirisine salynǵan ınvestıtsııalar 9 aı ishinde 2,6 esege ósip, 7 mıllıard teńgege jetken.

Sonymen qatar óńirde baǵany turaqtandyrý baǵytyndaǵy sharalar belsendi túrde júrgizilip jatyr.

– Baǵanyń ósýin tejeý úshin 2,8 mıllıard teńge bólindi. Jergilikti óndirýshilermen forvardtyq kelisimsharttar jasalyp, naýbaıhanalar qoldaý taýyp otyr. Sondaı-aq fermerler óz ónimderin tikeleı sata alatyn áleýmettik pavılondar ashyp jatyrmyz. Onda saýda oryndary tegin beriledi. Qazir bir pavılon jumys istep tur, taǵy ekeýiniń qurylysy júrip jatyr. Áleýmettik pavılondar – qala turǵyndary úshin sapaly ári qoljetimdi ónim alýdyń, al fermerler úshin ónim ótkizý naryǵyn keńeıtýdiń naqty múmkindigi, - dedi Ermaǵanbet Bólekbaev.