Qaraǵandylyq fermer bir úıir jylqyny qyryp tastaǵan

QARAǴANDY. KAZINFORM — Qaraǵandy oblysynda kópshilikti dúr silkindirgen oqıǵa tirkeldi: jergilikti fermer ózge adamnyń jylqylaryna oq atqan. Janýarlar onyń jaıylymyna kirip ketkeni belgili boldy. 

Nura aýdanynyń Zarechnoe aýyly mańynan turǵyndar oq qarýdan qyrylǵan jylqylardy taýyp alǵan. Aldyn ala málimet boıynsha, barlyǵy 17 jylqyǵa oq tıgen, olardyń 14-i ólip qalǵan. Taǵy úsheýi jaraly.

Kýágerlerdiń aıtýynsha, oq atqan adam — osy aýyldyń fermeri. Olardyń sózine qaraǵanda, sharýa qojalyǵynyń ıesi óz jaıylymyna kirip ketken tabyndy avtokólikpen qýyp júrip, janýarlarǵa birneshe ret oq atqan. Qandy oqıǵadan keıin er adam oqıǵa ornynan boı tasalaǵan.

Aýyl turǵyndary kúdiktiniń iri jer ıesi ekenin aıtady. Sol sebepti mal ıeleri ony jaýapkershilikten jaltaryp ketedi dep alańdap otyr.

Qaraǵandy oblysy polıtsııa departamentiniń baspasóz qyzmeti kúdiktiniń ustalǵanyn rastady.

— Bóten adamdardyń múlkin ádeıi joıý deregi boıynsha qylmystyq is qozǵaldy. Polıtsııa qyzmetkerleri Nura aýdanynyń 53 jastaǵy turǵynyn anyqtap, bólimshege jetkizdi. Qazirgi ýaqytta oqıǵanyń barlyq mán-jaıyn jan-jaqty jáne obektıvti anyqtaýǵa baǵyttalǵan tergeý amaldary júrgizilip jatyr, — delingen óńirlik PD habarlamasynda.

Osyǵan deıin Shyǵys Qazaqstan oblysynyń Kúrshim aýdanyna qarasty Maraldy aýylynda segiz iri qaranyń qyrylýyna baılanysty júrgizilgen zertteýler aıaqtalǵany jaıly jazǵan bolatynbyz.