Qaraǵandylyq arheologter saq jaýyngeri jerlengen qorymdy tapty
QARAǴANDY. KAZINFORM — Qaraǵandy oblysynda arheologter saq dáýirine jatatyn jaýyngerdiń buzylmaǵan qabirin anyqtady. Bir metrden sál astam tereńdikte zertteýshiler oń qolynda qola qylysh ustaǵan er adamnyń qańqasyn tapqan. Qasynda jebe ushtary men altyn syrǵa jatqan. Bul týraly Qaraǵandy oblysy ákimdiginiń baspasóz qyzmeti habarlady.
Bul biregeı olja bıyl jazda Qaraǵandy oblystyq tarıhı-ólketaný murajaıynyń arheologteri Aqtoǵaı aýdanyndaǵy Qarabıe qorymyn qazý kezinde tabyldy. № 1 qorǵannyń tolyǵymen saqtalǵany belgili boldy, mundaı jaǵdaı saq eskertkishteri úshin óte sırek kezdesedi.
— Qabirdiń jabyndy tastaryn alǵannan keıin, biz qańqany tolyq anatomııalyq qalpynda taptyq. Onyń oń alaqanynda qylysh boldy. Mundaı oljaǵa jolyqpaǵanymyzǵa kóp jyl boldy, — deıdi murajaıdyń jalpy tarıh, arheologııa jáne etnografııa bóliminiń meńgerýshisi Daýren Júsipov.
Jerleý bizdiń dáýirimizge deıingi VII–VI ǵasyrlarǵa jatady jáne ǵalymdardyń pikirinshe, ol elıtaly jaýyngerler ókiline tıesili. Erekshe nazar aýdartqany — uzyndyǵy shamamen 30 santımetr bolatyn qos júzdi tutas quıylǵan qola akınak. Qarý dala jyrtqysh qustarynyń beınelerimen órnektelgen.
— Mundaı pishindegi jáne bezendirýdegi semser Qazaqstan aýmaǵynan buryn-sońdy tabylǵan emes. Bul jádiger saq dáýirindegi metall óńdeý isi men kórkemdik talǵamnyń joǵary deńgeıin aıǵaqtaıdy, — dep atap ótti arheolog, tarıh ǵylymdarynyń kandıdaty Arman Beısenov.
Qylyshtyń janynan arheologtar bes metall jebe ushyn jáne altyn syrǵa tapqan. Altyn áshekeı jaýyngerdiń qoǵamdaǵy joǵary mártebesin aıǵaqtaıdy. Zattardyń kórkemdik stıli Taldy-2 qorymynan tabylǵan «Altyn adam» jádigerlerimen úndes.
Barlyq tabylǵan buıym oblystyq murajaıdyń qoryna tapsyrylmaq. Ǵalymdar ejelgi jerleýdiń qupııasyn ashý úshin metallografııalyq, radıokómirtekti jáne antropologııalyq zertteýler júrgizýge daıyndalyp jatyr. Zertteý nátıjeleri kelesi jyly qysta tanystyrylady.
Aıta ketelik arheologııalyq materıaldardyń memlekettik qory jasalatyny týraly jazǵan edik.