Qaraǵandydaǵy joǵary oqý ornynyń túlekterin oqý ornynan tikeleı áskerge alyp ketip jatyr
QARAǴANDY. KAZINFORM – Qaraǵandyda dıplom qorǵap bitpesten túlekterdi ustap alyp, áskerı bólimshege kúshpen alyp ketip jatqany týraly oqıǵa áleýmettik jelilerde úlken shý shyǵardy. Stýdentterdiń týystary qysym kórsetilip, qorqytý bolǵanyn jáne zańsyz ustalǵandaryn málimdese, Qorǵanys mınıstrligi bul jaǵdaıǵa baılanysty tekserý bastalǵanyn habarlady.
Qaraǵandyda tehnıkalyq ýnıversıtet túlekterine qatysty janjal órship tur. Týystarynyń aıtýynsha, dıplomdyq jumystaryn qorǵap shyqqan stýdentterdi birden áskerı komıssarıat qyzmetkerleri alyp ketken. Bul týraly stýdentterdiń biriniń ápkesi áleýmettik jelide jarııalady. https://www.instagram.com/reel/DYyVknno32j/?igsh=MTEzOGQycHVnZjlyMA==
Onyń aıtýynsha, 23 mamyr kúni inisi QarTÝ-da dıplom qorǵaǵan. Alaıda qorǵaý aıaqtalǵannan keıin stýdentterdi aýdıtorııadan birden alyp ketken.
– Saǵat 10-nan keıin áskerı komıssarıat qyzmetkerleri olarǵa artqy kúnmen shaqyrtý qaǵazdaryn tarata bastady. Qaǵazda tańǵy saǵat 09:00-de derekterdi naqtylaý úshin kelýi kerek ekeni kórsetilgen. Osydan keıin jigitterdi kúshtep áskerı komıssarıatqa aparyp, medıtsınalyq komıssııadan ótkizdi, – deıdi boıjetken.
Ol inisiniń 1 shildege deıin áskerge shaqyrýdy keıinge qaldyrý quqyǵy bolǵanyn aıtty. Sebebi ol oqýyn aıaqtap, magıstratýraǵa túsýdi josparlaǵan. Alaıda onyń sózinshe, áskerı komıssarıat qyzmetkerleri dıplom qorǵaǵannan keıin keıinge qaldyrý merzimi kúshin joıady dep túsindirgen.
– Maǵan «Biz ony bermeımiz» dedi. Keıin eger kedergi jasasaq, ony Prıozerskige emes, odan da alys – Otarǵa nemese Shýǵa jiberetinin aıtty. Munyń bári qysym men qorqytý sııaqty estildi, - deıdi túlektiń ápkesi.
Sondaı-aq ol stýdentterdiń áskerı komıssarıatta bir táýlikten astam ýaqyt ustalǵanyn málimdedi. Onyń aıtýynsha, inisi dıplom qorǵaýdan keıin qolynda bolǵan qymbat jabdyq pen dıplomdyq jobasyn da tapsyryp úlgermegen.
– Ony birneshe júz myń teńge turatyn jobasymen birge dıplom qorǵaýdan tikeleı alyp ketti. Jigitterge dóreki sóılep, qorlap, balaǵat sózder aıtqan. Olardy qylmysker sııaqty kórgendeı áser qaldyrdy, – deıdi ol.
Budan bólek, týysynyń aıtýynsha, onyń inisi Saran qalasynda tirkeýde turǵan jáne sol jerdegi áskerı komıssarıatqa bekitilgen. Soǵan qaramastan, shaqyrý sharalary Qaraǵandyda júrgizilgen. Onyń sózinshe, alyp ketken stýdentterdiń arasynda ózge qalalardan kelgender de bolǵan.
Oqıǵadan keıin boıjetken áskerı prokýratýraǵa júginip, polıtsııa shaqyrǵan jáne Qorǵanys mınıstrligimen baılanysqa shyqqan. Onyń aıtýynsha, qoǵamda rezonans týyndaǵannan keıin inisin bosatqan.
Qazaqstan Qorǵanys mınıstrligi áleýmettik jelilerde taraǵan jarııalanymdarǵa baılanysty tekserý bastalǵanyn habarlady.
– Áleýmettik jelilerde joǵary oqý oryndarynyń túlekterine dıplomdyq jumystaryn qorǵaǵannan keıin jergilikti áskerı basqarý organdary tarapynan zańsyz áreketter jasaldy degen aqparat taralyp jatyr. Atalǵan fakti boıynsha azamattardy merzimdi áskerı qyzmetke shaqyrý sharalaryn ótkizý kezinde zań talaptarynyń saqtalýyn qosa alǵanda, barlyq mán-jaıdy zerdeleý maqsatynda tekserý uıymdastyryldy, – dep habarlady Qaraǵandy oblysynyń shaqyrý komıssııasy.
Vedomstvo málimetinshe, eger zańbuzýshylyqtar rastalsa, kináli tulǵalar zańda belgilengen tártippen jaýapkershilikke tartylady.
Eske salsaq, Qazaqstanda áskerı esepke alý júıesi zamanaýı formatqa kóshetini habarlanǵan bolatyn.
