Qaraǵandydaǵy joǵary oqý ornynda úsh stýdent týberkýlez juqtyrǵan
QARAǴANDY. KAZINFORM – Qaraǵandydaǵy E.A. Bóketov atyndaǵy QarUZÝ-niń stýdentteri arasynda týberkýlezben syrqattanýdyń úsh jaǵdaıy anyqtaldy. Mamandar baılanysta bolǵan adamdardy anyqtap, indetke qarsy is-sharalar júrgizip jatyr. Bul rette oqý ornynda karantın engizilgeni týraly áleýmettik jelilerde taraǵan aqparat shyndyqqa sáıkes kelmeıdi dep málimdedi mamandar.
Qaraǵandy qalasy Qazybek bı atyndaǵy aýdandyq sanıtarııalyq-epıdemıologııalyq baqylaý basqarmasynyń basshysy Nurlan Aımaǵanbetovtiń aıtýynsha, úsh jaǵdaı týraly aqparat mamandarǵa keshe keshke túsken.
— Búgingi tańda bizde úsh jaǵdaı tirkeldi. Áleýmettik jelilerde tarap jatqan on jaǵdaı týraly aqparat shyndyqqa sáıkes kelmeıdi. Qazir epıdemıologııalyq tekserý júrgizilip jatyr. Onyń aıasynda naýqastarmen baılanysta bolǵan adamdardyń, ıaǵnı jaqyn jáne alys baılanysta bolǵandardy anyqtap jatyrmyz, — dedi Nurlan Aımaǵanbetov.
Onyń aıtýynsha, syrqattanǵan stýdentter ártúrli fakýltetterde bilim alady. Olardyń arasynda jýrnalıstıka, bıologııa jáne shet tilderi baǵyttary bar. Stýdentter bir jataqhanada turmaıdy, jaldamaly páterlerde turady.
— Úsh stýdent te ártúrli korpýsta jáne ártúrli fakýltette oqıdy. Olar bir jataqhanada turmaıdy. Sondyqtan ázirge jataqhanada ortaq ınfektsııa oshaǵy bar dep aıtýǵa negiz joq. Stýdentterdiń biri Batys Qazaqstan oblysynan kelgen, qalǵan ekeýi — Qaraǵandy qalasynyń turǵyndary, — dep atap ótti aýdandyq sanıtarııalyq-epıdemıologııalyq baqylaý basqarmasynyń basshysy.
Aýrý jaǵdaılary anyqtalǵannan keıin mamandar eki oqý korpýsynda, sondaı-aq naýqastardyń turǵylyqty jerlerinde qorytyndy dezınfektsııa júrgizdi.
— Eki korpýsta jáne turǵylyqty jerlerdegi oshaqtarda qorytyndy dezınfektsııa júrgizildi. Dezınfektsııalyq is-sharalar kezinde úı-jaılar adamdardan bosatylady. Karantın engizildi degen aqparattyń paıda bolýyna osy jaǵdaı sebep bolýy múmkin, — dep túsindirdi Nurlan Aımaǵanbetov.
Sonymen qatar ol oqý ornynda karantın engizilmegenin atap ótti.
— Oqý ornynda eshqandaı karantın engizilgen joq. Qazir indetke qarsy is-sharalar júrgizilip, baılanysta bolǵan adamdarǵa medıtsınalyq baqylaý uıymdastyrylyp jatyr, — dedi aýdandyq sanıtarııalyq-epıdemıologııalyq baqylaý basqarmasynyń basshysy.
Atalǵan jaǵdaıǵa qatysty ýnıversıtet tarapy da túsinikteme berdi.
— Іs-sharalar júrgizilgen kezeńde jekelegen toptar ýaqytsha qashyqtan oqytý formatyna aýystyryldy. Jaqyn baılanysta bolǵan adamdar mamandardyń usynymdaryna sáıkes 14 kún boıy medıtsınalyq baqylaýda bolady. Budan bólek, stýdentter arasynda qosymsha profılaktıkalyq medıtsınalyq tekserý uıymdastyryldy, — dep málimdedi E.A. Bóketov atyndaǵy QarUZÝ baspasóz qyzmeti.
Mamandar sondaı-aq syrqattanǵan stýdentterdiń profılaktıkalyq medıtsınalyq tekserýden jáne flıýorografııadan qashan ótkenin anyqtap jatyr. Bul málimetter yqtımal baılanystardy belgileý jáne naýqastarmen birge bolǵan adamdardy odan ári baqylaý úshin qajet.
— Qazir stýdentterdiń flıýorografııadan jáne medıtsınalyq tekserýden qashan ótkenin anyqtap, barlyq baılanysty tekserip jatyrmyz. Aldaǵy ýaqytta jaqyn baılanysta bolǵan adamdar belgilengen tártipke sáıkes medıtsınalyq baqylaýda bolady, — dep habarlady Nurlan Aımaǵanbetov.
Mamannyń aıtýynsha, ázirge ınfektsııanyń naqty qaı jerde juqqanyn jáne aýrýdyń ortaq kózi bar-joǵyn aıtýǵa erte.
Epıdemıologııalyq tekserý jalǵasyp jatyr.
Mamandar ınfektsııanyń taralý qaýpi, atap aıtqanda, aýrýdyń túrine baılanysty ekenin de túsindirdi.
— Eger týberkýlezdiń qozdyrǵyshy syrtqy ortaǵa bólinetin ashyq túri týraly aıtatyn bolsaq, ınfektsııa tyǵyz qarym-qatynas kezinde aýa-tamshy joly arqyly berilýi múmkin. Alaıda osy úsh stýdenttiń aýrý túri men epıdemıologııalyq turǵydan qanshalyqty qaýipti ekeni ázirge anyqtalyp jatyr. Tekserý jumystary áli de jalǵasyp jatyr, — dep atap ótti aýdandyq sanıtarııalyq-epıdemıologııalyq baqylaý basqarmasynyń basshysy.
Qazirgi ýaqytta mamandar epıdemıologııalyq tekserýdi jalǵastyryp, baılanysta bolǵan adamdardyń sheńberin anyqtap, qajetti indetke qarsy is-sharalardy júrgizip jatyr.
— Jaǵdaı ýnıversıtet basshylyǵynyń baqylaýynda. Sanıtarııalyq qyzmetterdiń usynymdaryna sáıkes qabyldanyp jatqan ýaqytsha nysanaly sharalardy qospaǵanda, oqý úderisi shtattyq rejımde jalǵasyp jatyr, — dep qosty E.A. Bóketov atyndaǵy QarUZÝ baspasóz qyzmeti.
Buǵan deıin SQO-da týberkýlez juqtyrǵan 170 naýqas úı jaǵdaıynda em qabyldap jatqanyn habarlaǵan bolatynbyz.
