Qaraǵandydaǵy turǵyn úı men áleýmettik nysandardyń 95%-y jylytý maýsymyna daıyn
QARAǴANDY. KAZINFORM – Qaraǵandy qalasy 2025–2026 jyldardaǵy jylytý maýsymyna joǵary daıyndyqpen qadam basyp otyr. Búginde turǵyn úılerdiń 94%-dan astamy men áleýmettik nysandar tolyq daıyndyq aktilerin aldy. Al, jylý elektr ortalyqtaryndaǵy jáne jylý jelilerindegi jóndeý jumystary qyrkúıektiń sońyna deıin aıaqtalmaq.
Qala ákimdiginiń málimetinshe, ómirdi qamtamasyz etetin nysandardy, turǵyn úı qoryn jáne áleýmettik salany qysqa daıyndaýǵa arnalǵan keshendi jospar ázirlenip, búginde onyń oryndalý deńgeıi 95%-ǵa jetti.
Qaraǵandyda barlyǵy 2 829 kópqabatty turǵyn úı bar. Sonyń ishinde 2 634 úı ortalyqtandyrylǵan jylý júıesine qosylǵan, 26 úı gazben jylynady, al 12 úı jergilikti qazandyqtardan jylý alady. Shamamen 157 úı peshpen nemese elektrmen jylytylady. Onyń bir bóligi gazǵa qosylyp úlgerdi, qalǵandaryna modýldi qazandyqtar salý kózdelgen.
Qazirgi ýaqytta 2 492 kópqabatty úı, ıaǵnı turǵyn úı qorynyń 94%-y resmı túrde qysqa daıyn dep tanyldy. 225 úıde jylý júıesine aǵymdaǵy jáne kúrdeli jóndeý júrgizilip, shlamustaǵyshtar, ventılder, manometrler men tik qubyrlar tolyq aýystyryldy. Ásirese 152 «shetki» úıdiń jaǵdaıy ákimdiktiń erekshe baqylaýyna alyndy.
Áleýmettik sala nysandary da tolyq daıyn: 170 bilim berý uıymy, 41 densaýlyq saqtaý mekemesi, 26 mádenıet oshaǵy men 15 sport nysany jylytý maýsymyna ázir.
Jóndeý jumystaryna jalpy 52,4 mlrd teńge bólingen. Onyń ishinde 23,8 mlrd teńgeden astam qarjy «Qaraǵandy Energotsentr» JShS-niń jabdyqtaryn jańǵyrtý men jóndeýge baǵyttaldy. JEO-1-de 12 qondyrǵynyń 11-inde jumys tolyq aıaqtalsa, №5 qazandyqtaǵy jóndeý qyrkúıektiń sońyna deıin bitýi tıis. Al, JEO-3-te 14 qondyrǵynyń tek ekeýinde ǵana jumys jalǵasyp jatyr. Olardy da aı sońyna deıin aıaqtaý josparlanǵan.
Jylý jelileriniń 17,8 shaqyrymy jańartylyp, oǵan 9 mlrd teńge jumsaldy. Bul jumystardy «Teplotranzıt Qaraǵandy» JShS jáne bıýdjet esebindegi jobalar júzege asyrýda. 15 qyrkúıekten bastap júıelerge sý toltyrý bastaldy. Qazirgi tańda Sortırovka men Prıshahtınsk aýdandarynyń jelileri qosylyp úlgerdi.
Sonymen qatar «Qaraǵandy Sý» JShS 36,5 shaqyrym sý qubyry men 21 shaqyrym káriz jelisin jóndeý jumystaryn aıaqtaýǵa jaqyn. «Tarıfti ınvestıtsııaǵa aıyrbastaý» baǵdarlamasy men bıýdjet qarjysy esebinen qosymsha 65 shaqyrymnan astam sý qubyryn salý jáne jańartý josparlanǵan.
Energetıka salasy da daıyndyqtaryn baıandady. «Qaraǵandy Jaryq» 7,4 mlrd teńgeden astam qarajatqa jóndeý jumystaryn atqaryp, elektr berý jelileri men transformatorlyq qosalqy stantsııalardy jańartty. Sonyń nátıjesinde elektr jelileriniń tozý deńgeıi 24,36%-ǵa deıin tómendedi.
Ákimdiktiń dereginshe, jylytý maýsymy qalada ortasha táýliktik temperatýra bes kún qatarynan +8 gradýstan tómendegen jaǵdaıda bastalady.
Aıta keteıik, óńirde jeke sektor turǵyndary da qystyń qamyna erte kiristi. Halyq úılerin qatty otynmen qamdaýǵa asyǵyp jatyr. Qaraǵandy oblysynda kómirdi 55 saýda núktesinen satyp alýǵa bolady.