Qaraǵandy: polıtsııa beketindegi qaıǵyly oqıǵadan soń basshylar qyzmetinen ketti
QARAǴANDY. KAZINFORM — Qaraǵandy qalasyndaǵy Mıhaılov polıtsııa bóliminiń tirek pýnktinde áıeldiń máıiti tabylýyna baılanysty qyzmettik tergeý júrgizildi. Nátıjesinde birneshe basshy qyzmetinen bosatyldy.
Qyrkúıektiń sońynda bolǵan qaıǵyly oqıǵadan keıin Qaraǵandy polıtsııasynyń birqatar basshyny jaýapkershilikke tartty. Qyzmetinen Mıhaılov polıtsııa bóliminiń bastyǵy, onyń qyzmet jónindegi orynbasary jáne ýchaskelik ınspektorlar jumysyn qadaǵalaǵan orynbasary bosatyldy. Sondaı-aq qala basqarmasy men oblystyq departamenttiń birneshe qyzmetkerine qatań sógis jarııalandy.
Oqıǵa 29 qyrkúıekte túnde bolǵan. Aldyn ala derekter boıynsha, polıtsııa maıory kezekshilik kezinde burynnan tanys áıeldi tirek pýnktine shaqyrǵan. Kelesi kúni, 30 qyrkúıekte, aǵa ýchaskelik ınspektor dıvanda jatqan áıeldiń denesin jáne jumys ústeliniń janynda es-tússiz jatqan áriptesin tapqan. Er adam aýrýhanaǵa jetkizilip, dárigerler onyń ómirin saqtap qaldy.
Oblystyq densaýlyq saqtaý basqarmasynyń baspasóz qyzmeti polıtsııa qyzmetkeriniń jaǵdaıy týraly málimet berdi:
— Naýqas jansaqtaý bóliminen jalpy bólimge aýystyryldy, jaǵdaıy ortasha aýyr, — delindi vedomstvo habarlamasynda.
Qaraǵandy oblysy polıtsııa departamentiniń baspasóz qyzmeti habarlaǵandaı, oqıǵa boıynsha qyzmettik tergeý men tártiptik komıssııanyń otyrysy ótkizilgen.
— Tergeý nátıjesinde Mıhaılov polıtsııa bóliminiń bastyǵy men onyń orynbasary atqaryp júrgen laýazymdarynan bosatyldy. Qaraǵandy qalalyq polıtsııa basqarmasy men oblystyq departamenttiń birqatar basshysyna qatań tártiptik sharalar qoldanyldy, — dep málimdedi baspasóz qyzmeti.
Qaıtys bolǵan áıeldiń isi boıynsha sotqa deıingi tergeý júrgizilip jatyr. Tergeý aıasynda oqıǵanyń barlyq mán-jaıy anyqtalyp jatyr. Qazirgi ýaqytta em qabyldap jatqan ýchaskelik ınspektor qyzmetinen ýaqytsha shettetildi. Ony jumystan bosatý týraly másele medıtsınalyq ońaltý aıaqtalǵannan keıin qaralady.
— Departament basshylyǵy kez kelgen qyzmettik nemese áskerı tártipti buzýǵa nóldik tózimdilik qaǵıdasyn ustanady. Shenine de, qyzmetine de qaramastan biz budan keıin de mundaı jaǵdaılarǵa qatań shara qoldanatyn bolamyz, — dep atap ótti vedomstvo ókilderi.