Qaraǵandydaǵy shaǵyn dámhanada gaz jarylysynan eki adam qaza tapty

QARAǴANDY. KAZINFORM - Qaraǵandy qalasynda oryn alǵan qaıǵyly oqıǵa saldarynan eki adam kóz jumdy. Dárigerler aýyr kúıik alǵan naýqastardyń ómirin saqtap qala almady.

Fastfýd dámhanasynda gaz ballony jarylýy nátıjesinde tórt adam zardap shekti. Bul aqparatty oblystyq Densaýlyq saqtaý basqarmasy rastady.

Tótenshe jaǵdaı 22 qańtar kúni Ermekov kóshesinde boldy. Shaǵyn dámhanada gaz ballony jarylyp, sonyń saldarynan órt shyqty. Jalyn nysannyń ishki jáne syrtqy qaptamasyna, sondaı-aq jıhazdarǵa tez tarap ketken. Órttiń jalpy aýmaǵy shamamen 30 sharshy metrdi qurady.

Oqıǵa ornyna jedel túrde órt sóndirý bólimsheleri jetip, qutqarýshylar dámhanadan kólemi 27 lıtr bolatyn taǵy eki gaz ballonyn alyp shyqty. Bul shara órttiń odan ári órshýine jol bermedi.

Tótenshe jaǵdaı saldarynan tórt adam túrli dárejede jaraqat aldy. Úsheýi aýyr halde jansaqtaý bólimine jetkizilse, taǵy bir naýqas ortasha dárejeli kúıikpen kombýstıologııa bólimine jatqyzyldy.

Densaýlyq saqtaý basqarmasynyń habarlaýynsha, jaǵdaıy asa aýyr bolǵan eki naýqas alǵan jaraqattarynyń saldarynan kóz jumdy.

«Naýqastar aýrýhanaǵa keń kólemdi kúıikpen jetkizilip, alǵashqy mınýttardan bastap jan saqtaý bólimi dárigerleriniń baqylaýynda boldy. Olarǵa beıindi mamandardyń qatysýymen barlyq qajetti medıtsınalyq kómek kórsetildi. Alaıda qabyldanǵan sharalarǵa qaramastan, naýqastardyń ómirin saqtap qalý múmkin bolmady», - dep málimdedi vedomstvo.

Qazirgi ýaqytta oqıǵanyń naqty mán-jaıy anyqtalyp jatyr.

Aıta keteıik, buǵan deıin Qaraǵandy oblysynda jol boıyndaǵy dámhanada bolǵan gaz jarylysynan eki adam qaza tapqany habarlanǵan edi.