Qaraǵandydaǵy saıajaı alqabynda er adam men áıeldi atyp ketken
QARAǴANDY. KAZINFORM — Qaraǵandy oblysynda saıajaı qoǵamdastyǵynyń aýmaǵynan oq jaraqaty bar eki adamnyń denesi tabyldy. Polıtsııa qylmysqa qatysy bar degen kúdikpen 56 jastaǵy er adamdy ustady.
6 qyrkúıekte Qaraǵandy qalasynyń Álıhan Bókeıhan aýdanyndaǵy saıajaı qoǵamdastyqtarynyń birinen 43 jastaǵy er adam men 55 jastaǵy áıeldiń denesi tabylǵan. Ekeýiniń de denesinen oq jaraqatynyń belgileri anyqtaldy.
Atalǵan derek boıynsha QR Qylmystyq kodeksiniń «Adam óltirý» baby negizinde qylmystyq is qozǵaldy.
— Jedel-izdestirý jáne tergeý is-sharalary barysynda kúdiktiniń jeke basy anyqtalyp, 56 jastaǵy er adam ustaldy, — dep habarlady Qaraǵandy oblysy PD baspasóz qyzmeti.
Polıtsııanyń málimetinshe, ustalǵan azamat qylmys jasaǵanyn moıyndaǵan.
Qazirgi ýaqytta kúdikti ýaqytsha ustaý ızolıatoryna qamaldy.
Oqıǵanyń barlyq mán-jaıyn anyqtaýǵa baǵyttalǵan qajetti tergeý amaldary júrgizilip jatyr.
Buǵan deıin Qyzylorda oblysynyń Aral aýdanynda polıtsııa qyzmetkeriniń máıiti tabylǵany týraly málimdegen bolatynbyz.
