Qaraǵandydaǵy órt kezinde 24 adamdy evakýatsııalaýǵa qatysqan feldsher
ASTANA. KAZINFORM — Adam ómirin qutqarý úshin kásibılik, batyldyq jáne kez kelgen sátte kómekke kelýge daıyn bolý qajet. Bul qasıetter QR TJM Apattar medıtsınasy ortalyǵynyń Astana qalasyndaǵy fılıalynda feldsher bolyp qyzmet etetin Erkebulan Myrzabekovke tán.
Tótenshe jaǵdaılar mınıstrliginiń baspasóz qyzmetiniń málimetinshe, Erkebulan Maratuly shuǵyl medıtsınalyq kómek kórsetý salasynda kóp jyldan beri eńbek etip keledi. Osy ýaqyt ishinde ol qıyn jaǵdaıda tez sheshim qabyldap, jedel áreket ete biletin bilikti ári jaýapty maman retinde tanyldy.
Onyń kásibı jolyndaǵy mańyzdy synaqtardyń biri — 2024 jylǵy qazanda Qaraǵandy oblysynyń Qarqaraly aýdanynda bolǵan iri tabıǵı órttiń saldaryn joıý jumystaryna qatysýy boldy.
— Mundaı tótenshe jaǵdaıda úılesimdi áreket etý, ýaqyt joǵaltpaı kómek kórsetý jáne zardap shekkenderdiń jaǵdaıyn baqylaý asa mańyzdy edi. Qaýipti aımaqtan 18 bala men 6 eresek adam, onyń ishinde úsh júkti áıel evakýatsııalandy. Al Erkebulan Myrzabekov Qanaı-1 qystaǵyna baryp, ıis tıip ýlanǵan bes er adamǵa alǵashqy medıtsınalyq kómek kórsetti. Olar aýrýhanaǵa barýdan bas tartqan soń, feldsher tań atqansha janynda qalyp, jaǵdaılaryn baqylap otyrdy. Sondaı-aq olardyń hal-ahýaly týraly tıisti qyzmetterge turaqty túrde habarlap turdy, — delingen habarlamada.
Mundaı jumys medıtsınalyq bilim men tájirıbeden bólek, sabyrlylyqty, muqııattylyqty jáne jaýapkershilikti talap etedi. Tótenshe jaǵdaıda dárigerler men feldsherlerdiń der kezinde ári durys áreket etýi zardap shekkenderdiń densaýlyǵyn saqtaýǵa kómektesedi.
Erkebulan Myrzabekov shuǵyl medıtsınalyq kómek kórsetýmen ǵana shektelmeıdi. Ol profılaktıkalyq jáne túsindirý jumystaryna da belsendi qatysyp, turǵyndardyń qaýipsizdik mádenıetin arttyrýǵa úles qosyp júr. Atap aıtqanda, jol-kólik oqıǵalarynyń aldyn alý jónindegi sharalarǵa atsalysady. Eńbegi úshin Tótenshe jaǵdaılar mınıstrliginiń vedomstvolyq nagradalarymen marapattalǵan.
Erkebulan Myrzabekovtiń eńbek joly — óz isine adaldyq pen jaýapkershiliktiń úlgisi. Ol qıyn sátterde de mindetin abyroımen atqaryp, kómekke muqtaj jandardyń janynan tabylyp keledi. Onyń jumysynyń negizinde kásibı bilim men tájirıbeden bólek, adamdardyń densaýlyǵyn saqtap, ómirin qutqarýǵa degen shynaıy nıet jatyr.
Osyndaı mamandar QR Tótenshe jaǵdaılar mınıstrligi Apattar medıtsınasy ortalyǵynyń mańyzdy tiregi sanalady. Olar kúndelikti eńbegimen kásibılik pen adamgershiliktiń, tańdaǵan mamandyǵyna adal bolýdyń úlgisin kórsetip keledi.
Buǵan deıin 19 qazan — Qutqarýshylar kúni. Kásibı merekege oraı agenttik tilshisi azamattyq qorǵaý salasyndaǵy ózgeristerdi saralap, mamandardyń jumysyn zerdeledi.
