Qaraǵandydaǵy gaz quıý stantsııasy suıytylǵan gazdy zańsyz satqan
ASTANA. KAZINFORM — Tehnıkalyq retteý jáne metrologııa komıtetiniń Qaraǵandy oblysy boıynsha departamenti Qaraǵandy qalasynyń turǵynynyń ótinishi negizinde jospardan tys tekserý júrgizdi.
Tekserý barysynda Qaraǵandy qalasynyń Prıgorodnaıa kóshesinde ornalasqan avtogaz quıý stantsııasynda Qazaqstan Respýblıkasynyń ólshem birligin qamtamasyz etý salasyndaǵy zańnamasynyń talaptaryn buzý faktileri anyqtaldy.
Atap aıtqanda, nysanda suıytylǵan gazdy satý kezinde paıdalanylatyn ÝZGS-01 tıpti avtokólik quraldaryn suıytylǵan gazben toltyrý qondyrǵysy mindetti salystyryp tekserýden (poverkadan) ótpeı paıdalanylǵany anyqtaldy. Salystyryp tekserýden ótpegen ólsheý quraldaryn paıdalaný ólsheý nátıjeleriniń dál bolmaýyna jáne tutynýshylardyń quqyqtarynyń buzylýyna ákelýi múmkin.
Qazaqstan Respýblıkasynyń zańnamasyna sáıkes, memlekettik metrologııalyq baqylaýǵa jatatyn jáne salystyryp tekserýden ótpegen ólsheý quraldaryn paıdalaný zań buzýshylyq sanalady. Atalǵan quqyq buzýshylyq úshin, jaýapkershilik Qazaqstan Respýblıkasynyń Ákimshilik quqyq buzýshylyq týraly kodeksiniń 419-baby 1-bóliginiń 2-tarmaǵynda kózdelgen.
— Júrgizilgen tekserý qorytyndysy boıynsha kásipker ákimshilik jaýapkershilikke tartyldy. Qysqartylǵan ákimshilik is júrgizý tártibimen oǵan 670 375 teńge mólsherinde aıyppul salyndy. Sonymen qatar, kásiporynǵa anyqtalǵan buzýshylyqtardy joıý jáne gaz otynyn taratý kolonkalaryn tekserýden ótkizý boıynsha jumystar júrgizý týraly nusqama berildi, — delingen habarlamada.
Tehnıkalyq retteý jáne metrologııa salasyndaǵy zańnama talaptarynyń saqtalýyn baqylaý tutynýshylardyń quqyqtaryn qorǵaýǵa jáne taýarlar men qyzmetterdi ótkizý kezinde ólsheýlerdiń durystyǵyn qamtamasyz etýge baǵyttalǵan.
Osyǵan deıin Qazaqstandaǵy benzın, dızel jáne avtogaz baǵalaryn zerdelep kórgen edik.
