Qaraǵandydaǵy balanyń ólimi: DSM resmı málimdeme jasady

ASTANA. KAZINFORM — Búldirshin aýrý bastalǵannan keıingi ekinshi táýlikte ınfektsııalyq ortalyqqa emdeýge jatqyzylǵan. Jaǵdaıynyń nasharlaýyna baılanysty bala reanımatsııa jáne qarqyndy terapııa bólimshesine aýystyryldy, dep habarlaıdy Qaraǵandy oblysy Densaýlyq saqtaý basqarmasy.

Vedomstvonyń málimetinshe, tekserý barysynda balada bakterııalyq, vırýstyq jáne sańyraýqulaq tekti qozdyrǵyshtardyń bolýymen aralas ınfektsııaǵa baılanysty asa aýyr jaǵdaı anyqtaldy.

— Aýrý aǵymy aıqyn ımmýn tapshylyǵymen, sondaı-aq týǵannan bastap vaktsınatsııalaýdyń bolmaýymen asqynǵan, bul aǵzanyń ınfektsııaǵa qarsy turý múmkindigin edáýir shektep, júrgizilgen emniń tıimdiligin tómendetken. Medıtsınalyq kómek qoldanystaǵy klınıkalyq hattamalarǵa sáıkes tolyq kólemde kórsetildi, — deıdi aq halattylar.

Olardyń aıtýynsha, emdeý tásili birneshe ret respýblıkalyq konsılıýmdardyń sheńberinde, salalyq mamandardyń, sonyń ishinde shtattan tys bas balalar ınfektsıonısti, bas balalar pýlmonologi, bas balalar reanımatologiniń qatysýymen qaraldy.

— Qosymsha túrde ekstrakorporaldyq membranalyq oksıgenatsııany (EKMO) qoldaný múmkindigi de qarastyryldy. Alaıda konsılıýmnyń qorytyndysy boıynsha, jaǵdaıdyń aýyrlyǵyn jáne medıtsınalyq kórsetilimderdi eskere otyryp, bul ádis usynylmady. Qarqyndy terapııa júrgizilip, barlyq qajetti shara qabyldanǵanyna qaramastan, balany aman alyp qalý múmkin bolmady. Mundaı jaǵdaılar medıtsınalyq turǵydan asa kúrdeli sıpatta bolatynyn aıta ketý qajet. Aýyr ınfektsııa, ımmýn tapshylyǵy jáne vaktsınatsııalaýdyń bolmaýynyń úılesýi em ýaqytyly ári tolyq kólemde júrgizilgenniń ózinde de qolaısyz nátıjege ákelý qaýpin edáýir arttyrady, — delingen habarlamada.

Mınıstrlik atalǵan fakt boıynsha kórsetilgen medıtsınalyq kómekti obektıvti baǵalaý úshin táýelsiz sarapshylardy tarta otyryp, jan-jaqty tekserý júrgiziletinin habarlaıdy.

— Buqaralyq aqparat quraldarynyń ókilderin, blogerlerdi jáne qoǵamdy tek tekserilgen ári resmı aqparat kózderine súıenýge, asyǵys qorytyndy jasamaýǵa jáne rastalmaǵan derekterdi taratýdan bas tartýǵa shaqyramyz. Densaýlyq saqtaý mınıstrligi balanyń qaıtys bolýyna baılanysty onyń týǵan-týystary men jaqyndaryna shyn júrekten kóńil aıtady, — dep atap ótti vedomstvonyń baspasóz qyzmeti.

Osyǵan deıin BQO-da aýrýhanaǵa aýyr jaǵdaıda túsken bala kóz jumǵanyn jazǵanbyz.