Bala densaýlyǵy: 523 bala estý qabiletin qalpyna keltirý ımplantyn aldy
ASTANA. KAZINFORM — Qazaqstanda bala densaýlyǵyn saqtaý júıesi erte kómek kórsetýge, ońaltýǵa jáne zamanaýı medıtsınalyq tehnologııalardy engizýge basymdyq bere otyryp damyp keledi. Ásirese estý qabiletiniń joǵalýy men damý patologııalaryn qosa alǵanda, aýyr densaýlyq buzylystary bar balalarǵa erekshe nazar aýdarylyp otyr. Bul týraly Densaýlyq saqtaý mınıstrligi málimdedi.
Negizgi nátıjelerdiń biri — estýdi qalpyna keltirý baǵdarlamasy boldy: tolyq estý qabiletinen aıyrylǵan 523 bala memlekettiń esebinen tegin estý ımplanttaryn aldy. Bir ımplanttyń quny shamamen 6,5 mln teńgeni quraıdy. Erte aralasý júıesiniń damýynyń arqasynda mundaı operatsııalar búginde eki jasqa deıin jasalýda, al buryn kóbine keshirek kezeńde júrgiziletin. Bul balalardyń sóıleý qabiletiniń damýyna jáne qoǵamǵa tolyqqandy beıimdelýine aıtarlyqtaı múmkindik beredi.
— Ońaltý júıesi de qarqyndy túrde keńeıýde. Sońǵy eki jylda elde 81 ońaltý ortalyǵy ashyldy, onyń ishinde óńirlerdegi mekemeler de bar. Bıyl taǵy 11 ortalyqty iske qosý josparlanýda. Nátıjesinde ońaltý kómegimen qamtý deńgeıi 35%-ǵa ósip, 243 myń bala qoldaý aldy, — delingen habarlamada.
Patronaj júıesi de mańyzdy ról atqarady: úsh jasqa deıingi balalardyń 95%-y medıtsına qyzmetkerleriniń turaqty baqylaýynda. Bul úı jaǵdaıyndaǵy ólimdi 22%-ǵa tómendetýge múmkindik berdi.
Sonymen qatar, elde balalardy erte shaqtan qoldaý kórsetetin 700-den astam erte damý ortalyǵy jumys isteıdi.
— Biz saldardyń aldyn alýdan erte anyqtaý jáne profılaktıka júıesine kezeń-kezeńimen kóship kelemiz. Bizdiń mindetimiz — árbir bala turǵylyqty jerine qaramastan der kezinde kómek alyp, tolyqqandy damýǵa múmkindik alýy, — dep atap ótti Densaýlyq saqtaý mınıstri Aqmaral Álnazarova.
Ońaltý men joǵary tehnologııalyq medıtsınalyq kómekti damytý — balalardyń ómir sapasyn arttyrýǵa jáne múgedektik qaýpin tómendetýge baǵyttalǵan densaýlyq saqtaý júıesiniń basym baǵyttarynyń biri bolyp tabylady.
Buǵan deıin estý qabileti nashar 298 bala ońaltýdan ótkenin jazdyq.
