Qaraǵandydaǵy aýrýhanada shyqqan órt kezinde 20 naýqas evakýatsııalandy
QARAǴANDY. KAZINFORM — Qaraǵandyda 1 qyrkúıek kúni keshke kópbeıindi aýrýhana aýmaǵynda órt shyqty. Órt saǵat 21:29–da bastalyp, bir saǵattan keıin tolyq sóndirildi.
Qaraǵandynyń Qazybek bı atyndaǵy aýdanyndaǵy Muqanov kóshesinde ornalasqan kópbeıindi aýrýhana aýmaǵynda jınalǵan makýlatýra órtengen. Jalyn negizgi bes qabatty ǵımaratqa japsarlas salynǵan bir qabatty kireberis bóliktiń aǵash shatyr konstrýktsııasyna taraǵan.
Qaýipsizdik maqsatynda TJM qutqarýshylary aýrýhana ákimshiligimen birlesip, 20 naýqasty kórshiles blokqa evakýatsııalady.
— Habarlama túskennen keıin oqıǵa ornyna TJM bólimsheleriniń kúshteri men quraldary jedel túrde jiberildi. Medıtsınalyq mekeme ákimshiligimen birlesip, naýqastardy evakýatsııalaý júrgizildi. Órt jedel oqshaýlanyp, tolyq sóndirildi. Zardap shekkender joq, — dep habarlady Qaraǵandy oblysynyń tótenshe jaǵdaılar departamenti.
Órt 25 sharshy metr aýmaqty sharpydy. Órt sóndirýshilerdiń jedel áreket etýiniń arqasynda jalynnyń aýrýhananyń negizgi jáne japsarlas ǵımarattaryna taralýyna jol berilmedi.
Órttiń shyǵý sebebi anyqtalyp jatyr.
Buǵan deıin Almatyda 16 qabatty turǵyn úıden órt shyǵyp, 127 adam qutqarylǵanyn habarlanǵanbyz.
