Qaraǵandydaǵy № 3 emhana patsıentteri mekemeniń senimgerlik basqarýǵa ótýine qarsy
QARAǴANDY. KAZINFORM — Qaraǵandy qalasynyń turǵyndary men № 3 emhana ujymy medıtsınalyq uıymdy Qaraǵandy medıtsınalyq ýnıversıtetiniń senimgerlik basqarýyna berý týraly bastamaǵa alańdaýshylyq bildirip otyr. Halyq aqparattyń jetkiliksizdigin aıtyp, túsindirý jumystarynyń ashyq júrgizilýin talap etedi.
Al jergilikti bılik ázirge eshqandaı túpkilikti sheshim qabyldanbaǵanyn, másele tek talqylaý deńgeıinde turǵanyn málimdedi.
№ 3 emhananyń ujymy mekemeniń Qaraǵandy medıtsınalyq ýnıversıtetine senimgerlik basqarýǵa berilýi jónindegi usynysqa baılanysty resmı málimdeme taratty. Onda bul medıtsınalyq uıymnyń turaqty jumys istep turǵany, joǵary tıimdilik kórsetip otyrǵany jáne aımaqtaǵy AMSK uıymdary arasynda joǵary akkredıtatsııalyq sanaty bar jalǵyz mekeme ekeni erekshe atap ótilgen.
Emhanada 454 maman eńbek etedi, 61 myńnan asa turǵyn tirkelgen. Munda memlekettik baǵdarlamalar tabysty júzege asyrylyp, halyqqa keńeıtilgen kólemde medıtsınalyq qyzmet kórsetiledi. Ujymnyń aıtýynsha, emhana qazirgi deńgeıin saqtaı otyryp ári qaraı da damýǵa, tıimdi qyzmet etýge tolyq múmkindigi bar jáne ol úshin uıymdyq baǵynysty ózgertýdiń qajettiligi joq.
Atalǵan bastama turǵyndar arasynda dúrbeleń týdyrdy. Halyq bul usynystyń kenetten paıda bolǵanyn, al resmı túsindirme áli berilmegenin aıtady.
— Bul habarlama jurtty dúrliktirdi. Kórshiles elderdegi ońtaılandyrý tájirıbelerin jaqsy bilemiz, sol jaǵdaı bizde de qaıtalana ma degen alań bar. Ne bolatynyn túsinbeı otyrmyz. Medýnıversıtettiń basqarýy neni bildiredi? Qyzmetti qalaı alamyz? Nege halyqpen ashyq sóılespeıdi? Bizge alǵa qandaı jospar qurylǵanyn jáne nelikten usynylyp otyrǵanyn túsindirýi kerek, — deıdi Qaraǵandy turǵyny Aleksandr Raqymjanov.
Ol turǵyndardyń emhana basshylyǵymen kezdesý ótkizip, yqtımal ózgerister boıynsha jan-jaqty aqparat alǵysy keletinin jetkizedi.
№ 3 emhanaǵa tirkelgen basqa turǵyndar da basqarý medýnıversıtetke berilse, sapa tómendep, tájirıbeden ótýshilerdiń sany kóbeıedi degen qaýip bar ekenin aıtady.
— Men bul jerde 5–6 jyldan beri em alamyn. Bul — qaladaǵy eń jaqsy emhana, óz tájirıbemnen bilemin. Biraq eshkim aldyn ala eskertken joq. Jeke qolǵa berilse, qyzmet sapasy tómendep, tegin qyzmetter qysqarýy múmkin dep qorqamyz. Mundaǵy dárigerler óte bilikti, kezek joq — sonda ne úshin dál osy emhanany ózgertpek? — deıdi qala turǵyny Aısha Jumabekova.
Patsıentter kez kelgen reformanyń ashyq talqylanbaı, qupııa júrgizilgenine de narazy.
— Sheshim jasyryn qabyldanǵandaı áser qaldyrdy, bul biz úshin kútpegen jaıt boldy. Halyq bilikti dárigerlerdi basqa emhanalarǵa aýystyryp, bul jerge stýdentterdi qaldyrady dep alańdaıdy. Biz tájirıbe alańy bolǵymyz kelmeıdi. Mundaı sheshimder qoǵamdyq tyńdaý, túsinikteme, naqty dáleldermen qabyldanýy tıis, — deıdi qaraǵandylyq Ásııa Tóleýbaeva.
Onyń aıtýynsha, turǵyndar óz ustanymdaryn emhana basshylyǵyna resmı túrde jetkizýdi josparlap otyr, óıtkeni mundaı mańyzdy sheshim «halyq úshin jáne halyqtyń qatysýymen» qabyldanýy qajet.
Máselege qatysty bılik te túsinikteme berdi.
Qaraǵandy oblysy ákiminiń orynbasary Oraz Táýirbekov basqarýǵa berý jónindegi máseleniń qarastyrylyp jatqanyn rastady. Alaıda ol bul — ázirge tek mınıstrlik deńgeıinde túsken usynys ekenin basa aıtty.
— Bul — bizdiń usynys emes. Bastama mınıstrlik tarapynan keldi. Qazir tek qarap jatyrmyz. Eger medýnıversıtet bizdiń talaptarymyzdy qabyldap, qajetti ınvestıtsııa quıýǵa kelisse, onda talqylaýdyń ekinshi kezeńine ótemiz. Ázirge eshqandaı sheshim qabyldanǵan joq, — dedi óńir basshysynyń orynbasary.
№ 3 emhanaǵa qatysty jaǵdaı talqylaý barysynda bolǵanymen, qoǵam ashyqtyq pen aıqyndyqty talap etip otyr. Turǵyndar naqty túsindirme kútedi, emhana ujymy qazirgi formatty saqtaı otyryp jumys isteýge daıyn ekenin bildiredi, al bılik sheshim áli qabyldanbaǵanyn aıtady.
Aıta keteıik, osyǵan deıin Almatydaǵy jańa emhananyń qurylysy aıaqtalǵaly jatqanyn habarlaǵanbyz.