Qaraǵandyda joldardy kútip ustaıtyn fırmalarǵa 8,5 mln teńgeden asa aıyppul salyndy
QARAǴANDY. KAZINFORM — Qaraǵandy oblysy ІІD Ákimshilik polıtsııa basqarmasynyń qyzmetkerleri jyl basynan beri joldarǵa 46 tekserý júrgizdi. Nátıjesinde «QazAvtoJol» men onyń merdigerlerine 8,5 mln teńgeden astam aıyppul salyndy.
Mundaı tekserýler respýblıkalyq mańyzy bar avtojoldarda jol qozǵalysy qaýipsizdigin qamtamasyz etý úshin júrgiziledi. Jyl basynan beri ákimshilik polıtsııa «QazAvtoJol» UK» AQ QOF jol ıesine jáne merdiger uıymdarǵa avtojoldardy kútip ustaýdaǵy kemshilikterdi joıý jóninde 37 nusqama berdi.
— Jol qozǵalysy qaýipsizdigin qamtamasyz etý erejelerimen belgilengen avtojoldardy kútip ustaý erejeleriniń talaptaryn oryndamaǵany, sondaı-aq kólik quraldarynyń qaýipsiz jáne úzdiksiz qozǵalysyn qamtamasyz etpegeni úshin Qaraǵandy oblysy ІІD ákimshilik polıtsııa qyzmetkerleri jalpy somasy 8 500 000 teńgeden asatyn aıyppul jazyp, 148 ýákiletti jáne zańdy tulǵany ákimshilik jaýapkershilikke tartty, — dep habarlady Qaraǵandy oblysy PD baspasóz qyzmetІ.
Naýryzdyń 5-i men 7-si aralyǵynda ǵana oblystyń jol polıtsııasy qyzmetkerleri óńirdiń 10-nan astam avtojoldaryna tekserý júrgizip, nátıjesinde 6 uıǵarym shyǵaryldy. Joldardy sapasyz ustaǵany úshin, sonyń ishinde keshe Qaraǵandy-Temirtaý tas jolynda bolǵan JKO úshin tártip saqshylary 5 ákimshilik hattama toltyrdy.
— Ákimshilik jaýapkershilikke «KAJservıs» JShS № 46 jol paıdalaný basqarmasynyń bastyǵy tartyldy. Sonymen qatar, joldardy sapasyz kútip ustaýǵa qatysty usynysty oryndamaǵany úshin bıylǵy jyly «QazAvtoJol» UK» AQ QOF dırektoryna eki ákimshilik hattama jasaldy, — dep tolyqtyrdy Qaraǵandy oblysy PD.
Sondaı-aq, polıtseıler eldi mekenderdiń kóshelerindegi joldarynyń jaı-kúıine baqylaý men qadaǵalaý júrgizedi. Jol bóligin, kópirler men jol ótpelerin tazalaý sapasyna, sondaı-aq kóktaıǵaqqa qarsy materıaldarmen ýaqtyly sebýge erekshe nazar aýdarylady.
Qazirgi ýaqytta Qaraǵandy oblysynyń ákimshilik polıtsııa qyzmetkerleri oblystyń avtojoldaryndaǵy jaǵdaıǵa táýlik boıy monıtorıng júrgizýde, sondaı-aq jol-kommýnaldyq organdardyń jumysy úılestirilýde.
Esterińizge sala keteıik, «QazAvtoJol» 2025 jylǵy 7 naýryz aýa raıynyń nasharlaýyna baılanysty birneshe respýblıkalyq avtojol ýchaskelerinde barlyq kólik túrleriniń qozǵalysyna shekteý qoıylǵanyn habarlaǵan bolatyn.