Qaraǵandyda jylý jelilerindegi aqaý saldarynan birneshe shaǵyn aýdan jylýsyz qaldy
ASTANA. KAZINFORM - Qaraǵandynyń alty shaǵyn aýdany jylý jelilerindegi aqaýǵa baılanysty jylýsyz qaldy. "Teplotranzıt Qaraǵandy" JShS montajdaý brıgadalary jóndeý jumystaryn júrgizýde.
Qazirgi ýaqytta jylý qubyrlarynda qysymnyń tómendeýi Vostok-5, Kógildir toǵandar jáne ishinara Ońtústik-Shyǵys aýdandarynyń jylý jelilerinde, atap aıtqanda Gúlder yqsham aýdanynda, Muqanov kóshesinde jáne Taýgúl shaǵyn aýdanynda tirkelgen.
«Mamandar aqaýy bar ýchaskeni anyqtady, kúsheıtilgen montajdaý brıgadalary jiberildi jáne jaǵdaıdy tezirek joıý úshin barlyq sharalar qabyldanýda. Jylýmen jabdyqtaýdy qamtamasyz etý úshin tutynýshylar I-kezektegi taratý qubyryna aýystyryldy. Aýysý kezeńinde jylý berý parametrleriniń ýaqytsha tómendeýi múmkin. Jumystar múmkindiginshe qysqa merzimde aıaqtalady. Turǵyndardy turaqty jylýmen qamtamasyz etý úshin bar kúshimizdi salamyz», — dep jazdy «Teplotranzıt Qaraǵandy» JShS Instagram resmı paraqshasynda.
Saǵat 12:30–daǵy aqparatqa sáıkes, jóndeý jumystary aıaqtalýǵa jaqyn. Aqaýdy joıǵannan keıin birden jylý jelilerindegi qysym joǵarylaıdy.
Osyǵan deıin Saran qalasynda turǵyndar úılerde jylýdyń joqtyǵyna jappaı shaǵymdana bastaǵany týraly jazǵan bolatynbyz. Qala ákimi Erkin Baýlyqov Instagram-daǵy paraqshasynda jaǵdaıdy túsindirip, turǵyndardan keshirim surady.
Saran qalasyndaǵy jylý jaǵdaıyna baılanysty Energetıka mınıstri bastaǵan komıssııa quryldy. Komıssııa quramyna energııa qadaǵalaý salasynyń jáne tıisti organdardyń ókilderi kirdi. Almasadam Sátqalıev Sarandaǵy qazandyqtyń iske qosylmaýynyń sebepterin atady.
28 qazanda apparattyq jınalysta Qaraǵandy oblysynyń ákimi Ermaǵanbet Bólekpaev Saran qalasynyń ákimi Erkin Baýlyqov pen Qaraǵandy oblysynyń energetıka jáne TKSh basqarmasynyń basshysy Tilektes Dosaev qatań sógis alǵanyn málimdedi. Sondaı-aq oblys ákiminiń birinshi orynbasary Azamat Taıjanovqa eskertý túrinde tártiptik jaza jarııalandy.
Bul oqıǵadan soń Saran qalasynyń ákimi Erkin Baýlyqov qyzmetinen bosatylyp, onyń ornyna jańa ákim taǵaıyndaldy. Bul qyzmetti endi Daryn Bulqaıyr atqarady.