Qaraǵandyda jylytý maýsymy qashan bastalady

QARAǴANDY. KAZINFORM - Qaraǵandy qalasy qysqa tolyq daıyn. Turǵyn úı qorynyń 94 paıyzy jáne barlyq áleýmettik sala nysandary jylytý maýsymyna ázirlik aktilerin aldy.

Qala ákimi Meıram Kojýhovtyń aıtýynsha, jylý úılerge kestege sáıkes beriledi.

– Jylytý maýsymyn 25 qyrkúıekke qaraǵan túni, saǵat 00:00-de bastaımyz. Búginde jelilerdiń basym bóligi sýyq sýmen toltyrylǵan. Jylý berý protsesi kezeń-kezeńimen júredi: aldymen №3 jylý elektr ortalyǵynda qosymsha qazandyqtar qosylady, №1 JEO iske qosylady. Sýyq sý ortalyqta qyzdyrylyp, qaıta qubyrlarǵa beriledi. Osylaısha birtindep batareıalar jylyp, jylý aınalymy bastalady, – dep túsindirdi ákim.

Aldymen balabaqsha, mektep jáne aýrýhana sekildi áleýmettik nysandarǵa, sondaı-aq osy aýdandardaǵy turǵyn úılerge jylý jetkiziledi. Keıinirek basqarýshy kompanııalardyń ótinimderi boıynsha basqa úıler qosylady.

– Negizinen jylý úılerge demalys kúnderine qaraı jetedi. Bul turǵyndar úılerinde bolǵanda jylýdy qabyldaýlaryna múmkindik beredi. Al tólem tek resmı túrde jylý berilgen kúnnen bastap esepteledi, – dedi Kojýhov.

Qaraǵandyda 2 829 kópqabatty turǵyn úı bar. Onyń ishinde 2 634 úı ortalyq jylý júıesine qosylǵan. Taǵy 26 úı gazben, 12 úı jergilikti qazandyqtar arqyly jylytylady. Shamamen 157 úıde pesh nemese elektr jylýy qoldanylady. Onyń bir bóligi gazǵa kóshirilýde, qalǵandary úshin modýldik qazandyqtar salý kózdelgen.

Qazirgi tańda 2 492 úı qysqa tolyq daıyn. 225 kópqabatty úıde jylytý júıesi jóndelip, súzgiler, ventılder, manometrler men turbalar jańartyldy. Ákimdiktiń erekshe baqylaýynda – 152 «shetki» úı.

Áleýmettik sala nysandary da tolyq daıyn: 170 bilim berý mekemesi, 41 densaýlyq saqtaý uıymy, 26 mádenıet jáne 15 sport nysany jylytý maýsymyna ázir.

Jóndeý jumystaryna jalpy 52,4 mlrd teńge bólingen. Onyń 23,8 mlrd teńgeden astamy «Qaraǵandy Energotsentr» jabdyqtaryn jańǵyrtýǵa baǵyttaldy.

№1 JEO-daǵy 12 qondyrǵynyń 11-i jóndeýden ótip, sońǵy qazandyq qyrkúıek sońyna deıin iske qosylmaq. Al №3 JEO-da 14 qondyrǵynyń ekeýi ǵana jumys ústinde tur.

Jylý jelileri 17,8 shaqyrymǵa jańartyldy, jalpy quny – 9 mlrd teńge. Jumystardy «Teplotranzıt Karaganda» kompanııasy men bıýdjet qarjysyna júzege asqan jobalar atqarýda. 15 qyrkúıekten bastap júıelerdi sýmen toltyrý bastalǵan, qazir Suryptaý jáne Prıshahtınsk jelileri tolyq qosyldy.

Qala ákiminiń sózinshe, eń aldymen Maıqudyq, Sortırovka jáne Prıshahtınsk aýdandary jylýmen qamtamasyz etiledi. Odan keıin Ońtústik-Shyǵys pen qalanyń ortalyq bóligine jylý beriledi.

– Basqarýshy kompanııalar men jaýapty tulǵalardan júıelerdi aldyn ala tekserýdi suraımyz. Bul jylýdy kidirissiz qabyldaýǵa múmkindik beredi, – dedi Meıram Kojýhov.

Eske salsaq, Qaraǵandy 2025–2026 jylǵy jylytý maýsymyna joǵary deńgeıde daıyn ekeni buǵan deıin habarlanǵan bolatyn.