Qaraǵandyda jylytý maýsymy aıaqtaldy

QARAǴANDY. KAZINFORM – Qaraǵandyda kommýnaldyq qyzmetter jylytý maýsymyn resmı túrde aıaqtap, qala birtindep kóktemgi jumys tártibine ótip jatyr. Sheshim turaqty jylyný men aýa raıynyń qalypty jaǵdaıyna baılanysty qabyldandy.

Qalada turǵyn úıler men áleýmettik nysandarǵa jylý jáne ystyq sý berý 24 sáýirden 25 sáýirge qaraǵan túni tolyq toqtatylady.

Kommýnaldyq qyzmetterdiń málimetinshe, keıingi kúnderi ortasha táýliktik aýa temperatýrasy +10 gradýstan joǵary deńgeıde turaqty saqtalyp otyr. Bul – jylýmen jabdyqtaýdy toqtatýǵa qoıylatyn normatıvtik talaptarǵa tolyq sáıkes keledi. Osyndaı jaǵdaıda jylý berýdi jalǵastyrý ekonomıkalyq ári tehnıkalyq turǵydan tıimsiz dep tanyldy.

Buǵan deıin qala turǵyndaryna jylytýdy merziminen buryn óshirý múmkindigi usynylǵan bolatyn. Ol úshin «Teplotranzıt» qyzmet kórsetýshi uıymyna jazbasha ótinish berý qajet edi. Mundaı tásil árbir turǵyn úıdiń naqty qajettiligin eskere otyryp, jylý berýdi derbes retteýge múmkindik beredi.

Aıta keteıik, Qaraǵandy jylytý maýsymyn óńirlik keste sheńberinde aıaqtady. Buǵan deıin oblystyń iri qalalarynda, sonyń ishinde Temirtaýda, jylýdy óshirý 20 sáýirden keıin josparlanǵany habarlanǵan. Al Balqashta maýsym budan erterek – 10 sáýirde aıaqtaldy. Aýdandarda merzimder klımattyq erekshelikterge qaraı ártúrli: mysaly, Abaı aýdanynda jylý 15 sáýirde toqtatylsa, Buqar Jyraý aýdanynda ótpeli kezeń mamyr aıynyń basyna deıin jalǵasýy múmkin. 

Buǵan deıin Qaraǵandy oblysynyń qalalary men aýdandarynda jylý qashan óshiriletinin jazǵan edik.