Qaraǵandyda jyl basynan beri 17 myńnan asa alaıaqtyq qońyraý buǵattaldy
QARAǴANDY. KAZINFORM — Qaraǵandy oblysynda jyl basynan beri 1 306 alaıaqtyq deregi tirkeldi. Onyń 916-sy ınternet-tehnologııalardy paıdalaný arqyly jasalǵan.
Oblystyq prokýratýranyń málimetinshe, óńirde tirkeletin qylmystardyń shamamen 40%-yn alaıaqtyq faktileri quraıdy.
Internet jáne telefon arqyly jasalatyn alaıaqtyqtyń aldyn alý úshin oblys prokýratýrasy antıfrod Call-ortalyǵyn iske qosty. Júıe kúmándi telefon qońyraýlaryn anyqtap, olardy arnaıy daıyndalǵan operatorlarǵa baǵyttaıdy.
Call-ortalyqtyń jumysy nátıjesinde 17 myńnan astam alaıaqtyq qońyraý anyqtalyp, joly kesilgen.
Sonymen qatar, prokýratýra «Qazaqtelekom» AQ jáne baılanys operatorlarymen birlesip, alaıaqtyq áreketterdi der kezinde anyqtaý jáne toqtatý boıynsha jumys júrgizip keledi.
— Máselen, 83 jastaǵy áıelge bir kún ishinde birneshe ret qońyraý shalyp, depozıtindegi aqshany ıemdenýge áreket jasaǵan. Baılanys operatorynan kúmándi belsendilik týraly aqparat túsken soń, polıtsııa qyzmetkerleri zeınetkerdiń úıine baryp, alaıaqtardyń áreketin toqtatty. Taǵy bir jaǵdaıda 80 jastaǵy áıel depozıtinen 1,3 mln teńge sheship alyp, ony alaıaqtarǵa aýdarmaq bolǵan. Polıtsııa qyzmetkerleri der kezinde aralasyp, aqshanyń aýdarylýyna jol bermedi. Jyl basynan beri osyndaı sharalardyń nátıjesinde 40 qart azamatqa qatysty telefon alaıaqtyǵynyń joly kesilgen, — delingen vedomstvo habarlamasynda.
Prokýratýranyń málimetinshe, turǵyndar kóbine ınternet-dúkenderde, tanymal saýda alańdarynda jáne áleýmettik jelilerdegi onlaın saýda kezinde alaıaqtardyń arbaýyna túsedi. Sondaı-aq qylmyskerler bank kartasyndaǵy operatsııalar, lotereıa utystary, ınvestıtsııa, ótemaqy nemese járdemaqy týraly jalǵan habarlamalar jiberedi.
Keı jaǵdaıda alaıaqtar týystarynyń nemese tanystarynyń atynan habarlasyp, shuǵyl aqsha aýdarýdy suraıdy.
Prokýratýra azamattardy saq bolýǵa jáne jeke derekterin bógde adamdarǵa bermeýge, belgisiz siltemelerge ótpeýge, beıtanys adamdardyń ótinishi boıynsha qosymshalar júktemeýge jáne SMS arqyly kelgen rastaý kodtaryn eshkimge aıtpaýǵa shaqyrdy.
Osydan buryn alaıaqtar qoldy qylǵan qarajatty zań boıynsha qalaı qaıtarýǵa bolatynyn jazǵanbyz.
