Qaraǵandyda jer qoınaýyn paıdalanýshyǵa 9 mlrd teńgeden astam aıyppul salynýy múmkin
ASTANA. KAZINFORM – Qaraǵandy oblysynyń mamandandyrylǵan tabıǵat qorǵaý prokýratýrasy iri jer qoınaýyn paıdalanýshylardyń birinde ekologııalyq zańnamanyń óreskel buzylǵanyn anyqtady.
Prokýratýra málimetinshe, kásiporyn bes jyl boıy zııandy zattardy jer bederine tógý arqyly qorshaǵan ortany lastap kelgen.
Tekserý barysynda baıytý qaldyqtaryn zańsyz jınaqtaý, ruqsatsyz emıssııalar shyǵarý, mys kontsentrattaryn baıytý qaldyqtaryn jınaýǵa arnalǵan dambany zańsyz paıdalaný jáne ekologııalyq talaptardyń basqa da buzylý faktileri anyqtalǵan.
«Prokýrorlyq tekserý nátıjesinde kásiporynnyń qorshaǵan ortaǵa júıeli túrde teris áser etkeni belgili boldy. Ekologııalyq zańnamany buzýdyń birneshe faktisi anyqtalyp, tıisti ákimshilik óndirister qozǵaldy. Qadaǵalaý organy tarapynan quqyq buzýshylyqtar úshin jalpy somasy 9 mıllıard teńgeden asatyn aıyppuldar qarastyrylǵan. Ekologııalyq qaýipsizdikti qamtamasyz etý jáne tabıǵı resýrstardy qorǵaý máseleleri prokýratýranyń turaqty baqylaýynda», – dep habarlady qadaǵalaý organy.
Sonymen qatar memleketke keltirilgen zalal kólemi 2 mıllıard teńgeden asqan jerdiń búliný faktisi boıynsha QR Qylmystyq kodeksiniń 332-babynyń 2-bóligimen qylmystyq is tirkeldi.
Qazirgi ýaqytta sotqa deıingi tergep-tekserý amaldaryn Qaraǵandy oblysy prokýratýrasynyń salalyq basqarmasy júrgizip jatyr.
Aıta keteıik, Pavlodarda tuşy jáne tuzdy kólder ornalasqan jer zańsyz satylmaq bolǵan.
