Qaraǵandyda jer qazý jumystary kezinde topyraq opyrylyp, eki adam mert boldy

QARAǴANDY. KAZINFORM - Qaraǵandyda káriz qubyrlaryn aýystyrý kezinde qaıǵyly oqıǵa tirkeldi. Jer qazý jumystary kezinde topyraq opyrylyp, eki jumysshy kóz jumdy.

Oqıǵa 1 qazan kúni Shahterler dańǵylynda bolǵan. Polıtsııa departamentiniń málimetinshe, opyrylǵan topyraq astynda merdiger kompanııanyń qyzmetkerleri qalǵan. Ókinishke qaraı, olardyń ekeýi de oqıǵa ornynda jan tapsyrǵan.

— Qazirgi ýaqytta Qylmystyq kodekstiń «Taý-ken nemese qurylys jumystaryn júrgizý kezinde qaýipsizdik erejelerin buzý, abaısyzda eki adamnyń ólimine ákep soqtyrǵan qaıǵyly oqıǵa» babymen qylmystyq is qozǵaldy, — dep habarlady Qaraǵandy oblystyq polıtsııa departamenti.

«Qaraǵandy Sý» JShS-si oqıǵanyń bolǵanyn rastady, merdiger kompanııa qaza tapqandardyń jerleý rásimin tolyqtaı óz esebinen ótkizetinin málimdedi.

— Oqıǵanyń mán-jaıyn polıtsııa anyqtap jatyr. Biz marqumdardyń týystary men jaqyndaryna qaıǵyryp kóńil aıtamyz, — delingen kásiporynnyń resmı túsiniktemesinde.

Qaıǵyly oqıǵaǵa qatysty málimdeme jasaǵan merdiger uıym «NS Sıstema» JShS ókilderi de aqparat berdi.

— Aldyn ala derekter boıynsha, oqıǵa saldarynan eki adam qaza boldy. Olardyń aty-jónderin tekserý barysynda «NS Sıstema» JShS qyzmetkerleri emestigi anyqtaldy. Qazirgi tańda bizde ózge aqparat joq, ishki tekseris júrip jatyr. Tergeý organdarynyń jumysyna jan-jaqty qoldaý kórsetemiz. Bul – marqumdardyń otbasylary úshin orny tolmas qasiret. Biz jaqyndaryna tereń qaıǵyryp, kóńil aıtamyz. Jerleý rásimin uıymdastyrý shyǵyndaryn kompanııa óz moınyna alady, — dep habarlady uıymnyń baspasóz qyzmeti.

Eske sala keteıik, buǵan deıin Pavlodarda jylý-elektr ortalyǵynda jumysshy qaza tapqany jaıly habarlaǵan bolatynbyz.