Qaraǵandyda jeke klınıkada er adam kóz jumdy: polıtsııa qylmystyq is qozǵady
QARAǴANDY. KAZINFORM — Áleýmettik jelilerde Qaraǵandy turǵyny jeke klınıkada ota jasatpaqshy bolǵan joldasy túsiniksiz jaǵdaıda qaıtys bolǵanyn jarııalap, kómek surady, dep habarlaıdy Kazinform agenttiginiń tilshisi.
Áleýmettik jelidegi jazbasynda Krıstına Ermolova joldasy 6 qańtarda josparly ota jasatý úshin jeke klınıkaǵa barǵanyn aıtady.
- Keshe tústen keıin Qaraǵandy qalasyndaǵy «Alanda» jeke klınıkasynyń operatsııalyq bóliminde meniń joldasym Ermolov Vıacheslav qaıtys boldy. Men buǵan áli sene alar emespin. Bul klınıkaǵa ol asqazanyna ota jasatý úshin barǵan edi. «Alanda» klınıkasy maǵan onyń óliminiń sebebi týraly áli kúnge deıin naqty túsinikteme bergen joq. Meniń suraǵym kóp. Nege kúıeýim qaıtys bolǵannan keıin onyń denesi meniń kelisimimsiz jeke máıithanaǵa jetkizilgen, maǵan nege habarlamaǵan? - dep jazady marqumnyń áıeli.
Ol otaǵa daıyndyq, onyń júrgizilýi jaıly tolyq aqparatty talap etpekshi.
- Osy ýaqytqa deıin operatsııaǵa daıyndyq qalaı júrgizilgeni belgisiz. Baqylaýshy dárigerlerdiń qaısysy joldasymda qant dıabeti bar-joǵyn, qan qysymyn, bala kezinde gepatıt jáne t. b. aýrýlary bolǵanyn anyqtap almaı, operatsııa jasaýǵa usynys bergenin eshkim bilmeıdi. Anestezııa engizilgennen keıin joldasymnyń tynysy toqtap qalypty. Engizilgen anestezııa men relaksanttardyń mólsheri de belgisiz jáne keıinnen reanımatsııalyq protsedýralar qalaı júrgizildi? Nelikten maǵan onyń ólimi týraly ýaqytyly habarlanbady jáne máıit jeke máıithanaǵa esh eskertýsiz jetkizildi? Bul sonda qalypty jaǵdaı ma? Naýqas qaıtys bolǵan kezde dárigerler osylaı isteýi kerek pe? Men otbasymyz úshin osy bir qıyn jaǵdaıda shyndyqtyń túbine jetkim keledi, - deıdi marqumnyń áıeli.
Ázirge bul qaıǵyly oqıǵanyń mán-jaıy anyq emes. Ólim faktisi boıynsha qylmystyq is qozǵaldy. Polıtsııa qyzmetkerleri marqumnyń denesin sot-medıtsınalyq saraptamaǵa jiberdi.
- Abaısyzda adam ólimine ákep soqqan medıtsına nemese farmatsevtıka qyzmetkeriniń kásibı mindetterin tıisinshe oryndamaý faktisi boıynsha sotqa deıingi tergeý bastaldy. Qazirgi ýaqytta oqıǵanyń mán-jaıy anyqtalyp jatyr, - dep málimdedi Qaraǵandy oblysy PD baspasóz qyzmeti.
Eske sala ketsek, buǵan deıin Qostanaıda qaıtys bolǵan naýqastyń týystary jedel járdem feldsherin soqqyǵa jyqqan bolatyn.