Qaraǵandyda jedel járdem júrgizýshisin urǵan jigit sottaldy
ASTANA. KAZINFORM – Qaraǵandy qalasy Álıhan Bókeıhan aýdandyq soty jedel járdem júrgizýshisine kúsh qoldaný arqyly buzaqylyq jasaǵan er adamǵa úkim shyǵardy. Bul týraly elimizdiń Joǵarǵy soty habarlady.
Prokýror men jábirlenýshiniń ókili aıyptyǵa 3 jylǵa bas bostandyǵynan aıyrý túrindegi jaza taǵaıyndaýdy, 12 160 teńge materıaldyq zalal jáne 5 000 000 teńge moraldyq zalal óteýdi suraǵan. Al sottalýshyny qorǵaýshy tarap bas bostandyǵynan aıyrmaýdy jáne jazany ishinara qanaǵattandyrýdy suraǵan. Sondaı-aq, sot jaza taǵaıyndaý kezinde aıyptynyń óz isine ókinýi men jas balalarynyń bolýyn eskergen.
«Sot úkimimen D., Qylmystyq kodekstiń 107-babynyń 2-bóliginiń 5) tarmaǵynda kózdelgen qylmysty jasaǵany úshin kináli dep tanylyp, jazany jeńildetetin jáne aýyrlatatyn mán-jaılardy, jasalǵan qylmystyń qoǵamdyq qaýiptiligin eskere otyryp, 2 jyl merzimge bas bostandyǵynan aıyrý túrindegi jaza taǵaıyndady. Sot úkimimen D. Qylmystyq kodekstiń 107-baby 2-bóliginiń 5) tarmaǵynda kózdelgen qylmys jasaǵany úshin kináli dep tanyldy jáne jasalǵan qylmystyń jeńildetetin jáne aýyrlatatyn mán-jaıdy, qoǵamdyq qaýiptiligin eskere otyryp, sot oǵan 2 jyl merzimge bas bostandyǵynan aıyrý jazasyn taǵaıyndady», - delingen úkimde.
Odan bólek, buzaqy sot úkimimen jábirlenýshige 2 mln teńge kóleminde moraldyq zalal, 12 160 teńgege jábirlenýshiniń emin, taǵy 700 myń teńgege qosymsha shyǵyndardy ótegen.
Sot úkimi kúshine engen joq.
Eske sala keteıik, bıyl 27 qańtarda er adam naýqasqa kelgen dárigerler brıgadasynyń júrgizýshisimen sózge kelip qalyp, judyryq ala júgirgen bolatyn.
Bul janjalǵa er adamnyń aýla jolymen óte almaǵany sebep bolǵan. Sosyn ol qashyp ketti. Depýtat Elnur Beısenbaev jedel járdem júrgizýshisin soqqyǵa jyqqan kúdiktini tez arada tabýdy talap etti.
1 aqpan kúni jedel járdem júrgizýshisin urǵan er adam ustaldy. Keıinnen Іshki ister mınıstrligi kúdiktiniń jazasyz qalmaıtynyn jetkizgen bolatyn. Sondaı-aq, jedel járdem júrgizýshisin urǵan jigittiń soty onlaın ótetini belgili boldy.
