Qaraǵandyda jaıaý júrginshiler jolaǵynan ótip bara jatqan oqýshyny kólik qaǵyp ketti
QARAǴANDY. KAZINFORM - Búgin tańerteń Qaraǵandy kósheleriniń birinde jol talǵamaıtyn kólik 12 jasar oqýshyny qaǵyp ketti. Jaıaý júrginshiler jolaǵynan ótip bara jatqan bala alǵan jaraqattary saldarynan kóz jumdy, dep habarlaıdy Kazinform agenttiginiń tilshisi.
Jaısyz oqıǵa búgin tańerteń saǵat 8.00 shamasynda boldy.
«Toıota» jol talǵamaıtyn kóligin basqarǵan 51 jastaǵy júrgizýshi Amanjolov kóshesimen kele jatqan. Jol qozǵalysynyń qaýipsizdigin qamtamasyz etpeı, rettelmeıtin jaıaý júrginshiler jolaǵynan ótip bara jatqan 12 jasar oqýshyny qaǵyp ketken. Jol-kólik oqıǵasy saldarynan jaıaý júrginshi alǵan jaraqattarynan medıtsınalyq mekemede qaıtys boldy. JKO faktisi boıynsha sotqa deıingi tergeý bastaldy. Qajetti saraptamalar taǵaıyndaldy. Júrgizýshi ýaqytsha ustaý ızolıatoryna qamaldy», - dedi Qaraǵandy oblysy PD bastyǵynyń orynbasary Ernat Qalıaqparov.
Oqıǵa ornynda túsirilgen beıne áleýmettik jelilerde tarap jatyr. Jeli paıdalanýshylary bul jaıaý júrginshiler ótkeliniń óte qaýipti ekenin jáne júrgizýshiler árdaıym toqtaı bermeıtinin aıtady.
Óz kezeginde polıtsııa departamenti jol qozǵalysynyń qatysýshylaryn óte muqııat bolýǵa jáne jyldamdyq rejımin saqtaýǵa shaqyrady.
