Qaraǵandyda jarty mlrd teńgeden asatyn veıp ónimderiniń iri partııalary joıyldy
QARAǴANDY. KAZINFORM — Qaraǵandy oblysynda zańsyz satýǵa arnalǵan elektrondyq ónimderdiń iri partııalary eki qylmystyq is aıasynda tárkilendi. Іsterdiń birin tergeý kezinde tórt qoımasy, ınternet-dúkenderi, operatorlary men kýrerleri bar zańsyz saýda jelisiniń joly kesild
Qaraǵandy oblysy boıynsha Ekonomıkalyq tergep-tekserý departamentiniń málimetinshe, óńirde jalpy quny 570 mln teńgeni quraıtyn elektrondyq tutyný júıeleri men veıpterge arnalǵan suıyqtyqtardyń iri partııalary joıyldy. Ónimder eki qylmystyq is aıasynda tárkilenip, zattaı dáleldemeler retinde tanylǵan.
Qylmystyq isterdiń biri veıp ónimderin Telegram messendjeri arqyly satqan ınternet-dúkenniń qyzmetine qatysty. ETTD málimetinshe, uıymdastyrýshylar ónimdi ótkizýdiń tarmaqtalǵan júıesin qurǵan: taýarlardy saqtaý úshin tórt qoıma paıdalanylyp, ınternet-dúkenniń jumysyn operatorlar men kýrerler qamtamasyz etken.
— Veıpterdiń zańsyz aınalymy barǵan saıyn onlaın keńistikke aýysyp jatyr. Munda ónimdi ótkizý úshin messendjerler, ınternet-dúkender, kýrerlik jetkizý qyzmetteri jáne taýar saqtaýǵa arnaıy uıymdastyrylǵan oryndar paıdalanylady. Bul jaǵdaıda dál osyndaı tarmaqtalǵan shema anyqtaldy. Sonyń arqasynda ónimdi tikeleı satýshylardyń ǵana emes, ony ótkizýdi qamtamasyz etken ınfraqurylymnyń da qyzmetine tosqaýyl qoıyldy, — dep habarlady Qaraǵandy oblysy boıynsha ETTD.
Tintý barysynda quqyq qorǵaý organdary 30 myńǵa jýyq elektrondyq tutyný júıesin anyqtady. Tárkilengen partııanyń quny 340 mln teńgege baǵalandy.
Zańsyz ınternet-dúkendi uıymdastyrýshylar sot aldynda jaýap berdi. Olarǵa 2,5 jyl bas bostandyǵyn shekteý túrindegi jaza taǵaıyndaldy. Tárkilengen ónim qajetti protsestik rásimder aıaqtalǵannan keıin belgilengen tártippen joıyldy.
Taǵy bir iri partııa basqa qylmystyq is aıasynda tárkilendi. Onyń quramynda 3 495 elektrondyq tutyný júıesi jáne veıpterge arnalǵan 1 785 suıyqtyq boldy. Ónimderdiń jalpy quny 230 mln teńgeni qurady. Bul partııa da joıyldy.
Osylaısha, eki qylmystyq is aıasynda jalpy quny 570 mln teńgeni quraıtyn ónim zańsyz aınalymnan shyǵarylyp, joıyldy.
ETTD ókilderiniń aıtýynsha, tárkilengen partııalardy joıý olardyń qaıtadan zańsyz naryqqa túsý múmkindigin boldyrmaý úshin qajet. Rásim Qaraǵandy oblysy boıynsha Ekonomıkalyq tergep-tekserý departamentiniń qyzmetkerleri men basqa da múddeli tulǵalardyń qatysýymen júrgizildi.
— Bizdiń mindetimiz — tyıym salynǵan ónimniń iri partııalaryn anyqtap, tárkileýmen ǵana shektelmeı, onyń qaıtadan naryqqa túsýine jol bermeý. Sondyqtan zańda kózdelgen barlyq rásimder aıaqtalǵannan keıin zattaı dáleldemeler joıylýǵa tıis. Bul olardyń zańsyz aınalymda ári qaraı paıdalanylýyna jol bermeıdi, — dep atap ótti Qaraǵandy oblysy boıynsha ETTD.
Zańsyz ótkizý arnalaryna qatysty jumystar jalǵasyp jatyr. Ásirese tyıym salynǵan ónimderdi satýǵa paıdalanylatyn ınternet-dúkender men messendjerlerge erekshe nazar aýdarylady.
Buǵan deıin Qazaqstanda veıpterdiń zańsyz aınalymyna qarsy tergeý jalǵasyp jatqanyn, sondaı-aq jyl basynan beri Qarjylyq monıtorıng agenttigi zańsyz saýdanyń 25 deregin toqtatyp, 276 myńnan astam elektrondy tutyný júıesin tárkilegeni habarlanǵan bolatyn.
