Qaraǵandyda jańa týǵan sábıler «saýdasyna» qatysty is qaralyp jatyr
ASTANA. KAZINFORM — Qaraǵandyda jańa týǵan balalardy deldal arqyly bóten otbasylarǵa berý isine qatysty kópshilik nazaryn aýdartqan sot protsesi aıaqtalýǵa jaqyn.
Bul is qoǵamda qyzý pikirtalas týdyryp, bala satý men balany syıǵa tartý arasyndaǵy shekaranyń qanshalyqty kómeski ekeni talqylanýda.
Sot aldynda birneshe adam jaýap berýde: kóp balaly aýyl turǵyny, perınataldyq ortalyqtyń qyzmetkeri jáne balalardy asyrap alǵysy kelgen eki erli-zaıypty.
Tergeý nusqasyna saı, áıel adam 2022 jáne 2023 jyldary dúnıege kelgen eki sábıdi — qyz ben uldy — bosanǵan boıda basqa otbasylarǵa bergen. Bul protsess perzenthananyń medbıkesiniń kómegimen iske asqan.
Aıyptaý tarapy árbir jaǵdaıdyń qarjylyq syıaqymen qatar júrgenin alǵa tartady — naqty aıtqanda, ár bala úshin 3 mıllıon teńgeden berilgen. Qujattarda bıologııalyq ana bolashaq asyraýshyny resmı túrde «ákesi» retinde kórsetip, keıin onyń zaıyby balany zańdy jolmen asyrap alǵan.
Bastapqyda is adam saýdasy babymen tergelgen. Keıinirek Qylmystyq kodekstiń anaǵurlym jeńil — «kámeletke tolmaǵan balany zańsyz syıǵa tartý» baby boıynsha qaıta saralandy. Alaıda bul bap ta aýyr qylmys sanatyna jatady. Memlekettik aıyptaýshy barlyq qatysýshyǵa 8 jyldan 9 jylǵa deıin bas bostandyǵynan aıyrý jazasyn surady.
— Áıel adam shaǵyn aýylda turady. Nekesiz balaly bolý onyń abyroıyna nuqsan keltiretin edi. Sondyqtan ol sábılerin basqa otbasylarǵa berýdi jón sanaǵan. Bul — zań turǵysynan «syıǵa tartý» bolǵanymen, máni ózgermeıdi — mámile sanalady, — dep málimdedi prokýror Nurbek Quzbaqov.
Aıyptalýshylar óz kinásin moıyndamaıdy. Bıologııalyq ana eshqandaı aqsha almaǵanyn aıtyp, jalǵyz maqsaty — balalaryn jetimder úıine túsirmeı, olardy tolyqqandy otbasyna tabystaý bolǵanyn alǵa tartýda.
Qorǵaýshylar da bul áreketti «saýda» emes, áleýmettik negizi bar sheshim dep túsindiredi.
— Ol balalardyń ınternatqa emes, súıispenshilik pen qamqorlyqqa toly otbasynda ósýin qalaǵan. Bul satý emes. Bul — dástúr men áleýmettik jaýapkershilikke negizdelgen qadam. Qazaq eshqashan balany jetim qaldyrmaǵan, — deıdi qorǵaýshy tarap.
Búginde úsh jasar qyz ben eki jastaǵy ul qaıtadan asyrap alǵan otbasyna ýaqytsha qaıtarylǵan. Bul sheshim olardyń psıhoemotsıonaldyq jaǵdaıynyń nasharlaýyna baılanysty qabyldanǵan. Balalar sońǵy sheshim shyqqansha sol úılerde bolady.
Sottaǵy taraptardyń jaryssózi ótti, úkim áli jarııalanǵan joq.
Osyǵan deıin Qaraǵandy stansasynyń mańynda jolaýshy áıel jańa týǵan shaqalaqty poıyzdyń terezesinen laqtyryp jibergeni jaıly habarlaǵan bolatynbyz.