Qaraǵandyda jańa stadıon salynady
QARAǴANDY. KAZINFORM - Kelesi jyly Qaraǵandy qalasynyń Maıqudyq shaǵyn aýdanynda oqýshylar saraıy men jańa stadıon salynady. Qalada jańa kópfýnktsıonaldy sport klasteri úshin 70 gektardan astam jer bólindi. Keshen Maıqudyq pen Ońtústik-Shyǵys arasyndaǵy bos jerde paıda bolady, dep habarlaıdy Kazinform agenttiginiń tilshisi.
Jańa jabyq stadıon, basseıni bar ámbebap sport arenasy, kópfýnktsıonaldy muz kesheni Kógildir toǵandar men Ońtústik-Shyǵys arasynda salynady. Qaraǵandyny damytý jospary týraly oblys ákimi Ermaǵanbet Bólekpaev turǵyndarmen kezdesý barysynda málim etti.
- Prezıdent Qasym-Jomart Toqaev buqaralyq sportty damytýǵa kóp kóńil bóledi. Bizdiń aldymyzda deni saý urpaqty tárbıeleý, sondaı-aq otandyq sportshylardy daıarlaýmen aınalysý mindetteri tur. Kógildir toǵandar men Ońtústik-Shyǵys arasynda sporttyq klaster salý úshin 72 ga jer bóldik. Qaraǵandyǵa jańa stadıon qajet ekendigi týraly kópten beri aıtylyp keledi, Maǵan turǵyndar tarapynan osy suraq únemi qoıylady. Sondyqtan biz jabyq stadıon, hokkeı, konkımen syrǵanaý, mánerlep syrǵanaý jáne basqa da sport túrlerimen aınalysýǵa arnalǵan kópfýnktsıonaldy muz keshenin salamyz. Muz arenasy turǵyndardyń jappaı kelýi úshin de qoljetimdi bolady, – dedi Ermaǵanbet Bólekpaev.
- Sondaı-aq, aýmaqta jeńil atletıka manejin, basseıni, kúres jáne boks zaldary bar ámbebap sport arenasyn salamyz. Barlyq nysandar halyqaralyq standarttarǵa saı bolady, bul tıisti deńgeıde jarystar ótkizýge múmkindik beredi. Qurylys kelesi jyly bastalady. Bul aýdannyń damýyna oń áser etedi jáne sportshylarǵa serpin beredi. Maıqudyq turǵyndary úshin de jaqsy jańalyq. Balalardy damytý úshin Prıshahtınsk qalasyndaǵydaı zamanaýı oqýshylar saraıy salynady. Jer ýchaskesi tabyldy, daıyndyq protsesi bastaldy, - dedi ákim.
Sondaı-aq, óńir basshysy kelesi jyl Maıqudyq pen Ońtústik-Shyǵysty damytý jyly bolatynyn málimdedi.
Qaraǵandy oblysynda qola dáýirine tán qorymdar tabyldy.