Qaraǵandyda jańa qazandyq pen týrboagregat salynyp jatyr: qýat 140 MVt-qa artady
ASTANA. KAZINFORM — Qaraǵandydaǵy JEO-3-te jańa qazandyq pen týrboagregattyń qurylysy júrip jatyr. Joba aıaqtalǵannan keıin stantsııanyń elektr qýaty 140 MVt-qa, al jylý qýaty 180 Gkal/saǵatqa artyp, óńirdi energııamen qamtý senimdiligi kúsheıedi. Bul týraly Energetıka mınıstrligi málim etti.
Vedomstvonyń Memlekettik energetıkalyq qadaǵalaý jáne baqylaý komıtetiniń tóraǵasy Erjan Ertaev Qaraǵandy oblysyna jumys sapary barysynda 2026–2027 jyldardaǵy jylytý maýsymyna elektr jáne jylý energetıkasy nysandarynyń daıyndyǵyn tekserdi.
Jumys sapary Shahtınsk JEO-synan bastaldy. Bıyl stantsııada eki qazandyq agregatyna kúrdeli jóndeý júrgizilýde. Komıtet tóraǵasy jóndeý naýqanynyń barysymen jáne kúzgi-qysqy kezeńdegi stantsııanyń senimdiligin arttyrý jónindegi sharalarmen tanysyp, jóndeý jumystaryn ýaqytyly ári sapaly aıaqtaýdy tapsyrdy.
Kelesi nysan Saran qalasynyń qazandyq kesheni boldy. Sapar barysynda jylý kóziniń qysqy maýsymǵa daıyndyǵy, qajetti resýrstarmen qamtamasyz etilýi, jóndeý baǵdarlamasynyń oryndalýy jáne jabdyqtardyń eń joǵary qysqy júktemelerge daıyndyǵy qaraldy.
Qaraǵandyda Erjan Ertaev JEO-3-tegi jóndeý naýqanynyń barysymen jáne stantsııany keńeıtý jobasynyń, ıaǵnı jańa qazandyq agregaty men týrboagregat qurylysynyń júzege asyrylýymen tanysty. Joba aıaqtalǵannan keıin JEO-3-tiń elektr qýaty 140 MVt-qa, al jylý qýaty 180 Gkal/saǵatqa artady. Sonymen qatar stantsııada bir qazandyq agregaty men bir týrboagregatqa kúrdeli jóndeý júrgizilýde.
Sondaı-aq Komıtet tóraǵasy bıyl paıdalanýǵa berilgen «Qaraǵandy Jaryq» JShS-niń 110/10 kV «Jańa Maıqudyq» qosalqy stantsııasyna bardy. Bul nysan Qaraǵandy qalasynyń iri aýdandarynyń birin elektrmen jabdyqtaý senimdiligin arttyryp, jańa tutynýshylardy qosýǵa qajetti qýat rezervin qamtamasyz etedi.
— Jumys saparynyń negizgi nysandarynyń biri Temirtaý qalasynda MEKS ulttyq jobasy aıasynda júzege asyrylyp jatqan TM-3 jylý magıstralin rekonstrýktsııalaý jobasy boldy. Nysannyń jalpy uzyndyǵy 4,1 shaqyrymdy quraıdy. Búgingi tańda qurylys-montaj jumystarynyń 60%-y aıaqtalǵan. Komıtet tóraǵasy qurylys-montaj jumystarynyń qarqynyn jedeldetý qajettigin atap ótip, merdiger uıym men jaýapty tulǵalarǵa bekitilgen kesteni qatań saqtaýdy jáne jumystardy ýaqytyly ári sapaly aıaqtaý úshin barlyq qajetti sharalardy qabyldaýdy tapsyrdy, — delingen habarlamada.
Jumys sapary barysynda erekshe nazar erekshe baqylaýda turǵan GRES-1 stantsııasyna aýdaryldy. Nysanda jóndeý baǵdarlamasynyń iske asyrylý barysy, onyń ishinde qazandyq agregatyna júrgizilip jatqan kúrdeli jóndeý qaraldy. Komıtet tóraǵasy jóndeý jumystaryn tolyq kólemde oryndaýdy, jóndeý qarqynyn kúsheıtý úshin qajetti uıymdastyrýshylyq sharalardy qabyldaýdy, materıaldyq-tehnıkalyq resýrstardy jumyldyrýdy, óndiristik baqylaýdy kúsheıtýdi jáne barlyq jumystardy belgilengen merzimde aıaqtaýdy tapsyrdy.
