Qaraǵandyda jaldamaly páterden máıiti tabylǵan jasóspirimderdiń ólimine qatysty tergeý júrip jatyr

QARAǴANDY. KAZINFORM – Qaraǵandyda áleýmettik jelide qalada jaldamaly páterlerdiń birinde jasóspirimderdiń kóz jumǵany týraly aqparat tarady. Quqyq qorǵaý organdary oqıǵaǵa qatysty tergeýdi bastap ketti. Al zardap shekkender qazir dárigerlerdiń baqylaýynda.

Qalany dúr silkindirgen qaıǵyly jaǵdaı ortalyqtaǵy kópqabatty úılerdiń birinde boldy. Pablıkterdiń birinde jalǵa alynǵan páterde aldyn ala boljam boıynsha jasóspirimderdiń esirtkilik zatty shekten tys qoldanǵannan kóz jumǵany týraly habarlandy.

Aldyn ala derekterge sáıkes, páterdi eresek er adam jalǵa alǵan. Qonystanǵan soń ol páterge birneshe jasóspirimdi ertip kelgen. Tańerteń úı ıesi kiltin alý úshin kelgende jantúrshigerlik kóriniske kýá bolǵan: bir jasóspirim jan tásilim etken, taǵy úsheýi es-tússiz jatqan. Páter ıesi birden jedel járdem shaqyrǵan. 

Derekkózderdiń aıtýynsha, jasóspirimniń ólimine sebep bolýy múmkin negizgi nusqa — «sıntetıkalyq» asa qaýipti esirtki zatyn artyq mólsherde qoldaný. 
Qaraǵandy oblystyq Polıtsııa departamentiniń baspasóz qyzmeti oqıǵanyń mán-jaıyn rastady. Alaıda quqyq qorǵaýshylardyń málimetinshe, oqıǵa ornynan eki adamnyń máıiti tabylǵan.

- Oblystyń 18 jáne 15 jastaǵy eki turǵynynyń máıiti tabylýyna baılanysty syrtqy zorlyq-zombylyq belgileri anyqtalmaǵandyqtan, qylmystyq is qozǵaldy. Oqıǵanyń barlyq mán-jaıyn anyqtaý maqsatynda polıtsııa tolyq kólemde jedel-tergeý sharalaryn júrgizip jatyr. Tergeý barysy departament basshylyǵynyń baqylaýynda. Tergeý múddesine oraı ózge aqparat jarııa etilmeıdi, - dep málimdedi vedomstvo.

Qazirgi ýaqytta tergeý jalǵasyp jatyr.

Osyǵan deıin Qazaqstanda esirtkiniń zańsyz aınalymyna tartylǵan 60-tan astam kámeletke tolmaǵan jasóspirim ustalǵany týraly jarııalaǵan bolatynbyz.