Qaraǵandyda zeınetkerden 22 mln teńge jymqyrǵandar ustaldy

ASTANA. KAZINFORM –  Qaraǵandylyq zeınetkerden 22 mln teńge jymqyrǵan kúdiktiler ustaldy, – dep jazdy Polisia.kz.

Qaraǵandy qalasynyń polıtsııa qyzmetkerleri almatylyq áriptestermen birlesip, ınternet-alaıaqtyqqa qatysty kezekti qylmystyń betin ashty.

Jedel-izdestirý is-sharalary nátıjesinde Almaty qalasynda kórshi eldiń eki azamaty qolǵa tústi. Olar 77 jastaǵy Qaraǵandy turǵynyn aldap, 22 mıllıon teńgesin ıemdengen degen kúdikke ilindi. Alaıaqtar ózderin bank qaýipsizdik qyzmetiniń ókili retinde tanystyryp, zeınetkerge qońyraý shalyp, jınaqtaryn «qorǵaý» qajet degen syltaýmen bar qarajatyn óz erkimen berýge kóndirgen.

Áıel bastapqyda ózine alaıaqtyq jasalǵanyna senbegen, tek polıtseılermen uzaq áńgimeleskennen keıin ǵana qylmystyń qurbany bolǵanyn túsingen. Tintý barysynda kúdiktilerden jalpy somasy 22 mıllıon teńge tárkilendi.

Atalǵan fakti boıynsha QR Qylmystyq kodeksiniń 190-baby (Alaıaqtyq) boıynsha sotqa deıingi tergeý bastaldy. Kúdiktilerdiń basqa da uqsas qylmystarǵa qatysy bar-joǵy tekserilip jatyr.

- Polıtsııa eskertedi! Jeke jáne bank derekterińizdi bógde adamdarǵa jarııa etpeńiz. Telefon arqyly kelgen nusqaýlar boıynsha eshqashan aqsha aýdarmańyz. Esińizde bolsyn — eshbir bank ne polıtsııa qyzmetkeri sizden telefon arqyly aqsha talap etpeıdi jáne qupııa aqparat jınamaıdy. Kúmándi qońyraý nemese habarlama alǵan jaǵdaıda birden «102» nómirine nemese jaqyn mańdaǵy polıtsııa bólimshesine habarlasyńyz, - delingen habarlamada.

Aıta keteıik, BQO-da alaıaqtarǵa járdemdesken eki turǵynnan 1,5 mln astam teńge óndirildi.