Qaraǵandyda zeınetkerdi azaptaǵan bir top jasóspirimder sottaldy
QARAǴANDY. KAZINFORM – Qaraǵandyda zeınetkerge jasalǵan shabýylǵa qatysty qoǵamda úlken rezonans týdyrǵan is boıynsha úkim jarııalandy. Atalmysh is boıynsha toǵyz adam aıyptaldy, olardyń basym bóligi – kámeletke tolmaǵandar.
3 sáýirde Qaraǵandy oblysynyń kámeletke tolmaǵandardyń isteri jónindegi mamandandyrylǵan aýdanaralyq sotynda turǵyn úıge zańsyz kirý arqyly jasalǵan birqatar tonaý derekteri boıynsha qylmystyq is máresine jetti. Іs boıynsha toǵyz adam, onyń ishinde jeti jasóspirim jaýapqa tartyldy.
Sot anyqtaǵandaı, 2025 jylǵy aqpanda aıyptalýshylar 68 jastaǵy turǵynnyń páterine eki ret zańsyz kirgen. Onyń dármensiz jaǵdaıyn paıdalanyp, er adamdy uryp-soǵyp, qorlaǵan jáne bolǵan oqıǵany uıaly telefonǵa túsirgen. Sonyń saldarynan jábirlenýshige materıaldyq shyǵyn keltirilip, densaýlyǵyna ortasha aýyrlyqtaǵy zııan tıgen.
Taǵy bir qylmystyq jaıt sol jyldyń naýryz aıynda oryn alǵan. Kámeletke tolmaǵandardyń biri top quramynda basqa jábirlenýshiniń páterine kirip, oǵan kúsh qoldanyp, 95 myń teńge kóleminde múlkin jymqyrǵan.
Sotta aıyptalýshylardyń kinási olardyń ishinara moıyndaýlarymen, jábirlenýshiler men kýálardyń aıǵaqtarymen, sondaı-aq saraptama qorytyndylarymen dáleldendi.
Memlekettik aıyptaýshy barlyq aıyptalýshylarǵa naqty bas bostandyǵynan aıyrý jazasyn taǵaıyndaýdy surady. Al qorǵaý tarapy, kerisinshe, qoǵamnan oqshaýlamaıtyn jaza qoldanýdy ótindi. Jábirlenýshiler sottan zań aıasynda sheshim shyǵarýdy surady.
Qylmystyq bap sanktsııasy bes jyldan on jylǵa deıin bas bostandyǵynan aıyrýdy kózdegen. Sot qylmystyń aýyrlyǵyn, aıyptalýshylardyń kópshiliginiń kámeletke tolmaǵanyn jáne aýyrlatatyn mán-jaılardyń bolmaýyn eskere otyryp, naqty jaza taǵaıyndady: bir aıyptalýshyǵa – 7 jyl, taǵy bir kámeletke tolmaǵanǵa – 6 jyl 6 aı, eki jasóspirimge – árqaısysyna 5 jyl 6 aı, qalǵandaryna – 5 jyl bas bostandyǵynan aıyrý jazasy berildi.
Úkim ázirge zańdy kúshine engen joq.
Osyǵan deıin Túrkistan oblysynda qart ákesin azaptaǵany úshin 5 jylǵa sottalǵan adamnyń jazasy uzartylǵany jaıly habarlaǵan bolatynbyz.