Qaraǵandyda zańsyz úı salyp jatqandardyń tizimi jarııalandy
Qaraǵandy oblysynyń memlekettik sáýlet-qurylys baqylaý basqarmasy josyqsyz qurylys salýshylardyń tizimin jarııalady. «Qara» tizimde Qaraǵandyda qajetti ruqsat qujattarynsyz salynyp jatqan 11 turǵyn úı kesheni bar, dep habarlaıdy Kazinform.
«Qaraǵandy boıynsha búgingi tańda 11 nysanda ruqsat qujattarynyń tolyq paketi joq. Degenmen olar qurylysty bastap ketken nemese qandaı da bir jolmen jalǵastyryp jatyr. Naqtyraq aıtsaq, sot qaýlysymen «Qarqaraly» TK jáne Muqanov, 49r mekenjaıy boıynsha ornalasqan KTK, «Central Avenue» TK boıynsha qurylys-montaj jumystary toqtatyldy, qurylys salýshylar ákimshilik jaýapkershilikke tartyldy. Men áleýetti úleskerlerge eskertý jasaǵym keledi: jarnamaǵa senbeńizder. Eger kimde-kim osy nysandarǵa ınvestıtsııa salǵan bolsa, oılanyp, óz aqshasyn talap etken jón», - dedi GASK basqarmasynyń basshysy Serjan Aımaqov Óńirlik kommýnıkatsııalar qyzmetiniń alańynda ótken brıfıngide.
Onyń aıtýynsha, sot protsesinde basqa da nysandar boıynsha materıaldar bar.
Vedomstvo josyqsyz qurylysshylardyń tizimin tek óziniń saıtynda jáne áleýmettik jelilerdegi paraqshalarda ǵana emes, sonymen qatar barlyq tanymal pablıkterde jarııalaýǵa ýáde berdi.
- «Al-Farabi» TK, Muqanov kóshesi, 55/2 («T-K Building» JShS).
- «Han» TK, Muqanov kóshesi, 19/2 («TT INVEST-2022» JShS).
- «Nura» TK, Muqanov kóshesi, 51/4 bet («Satti Lux Stroy» JShS).
- «Qarqaraly» TK, Muqanov kóshesi, 51 («Buildary» JShS).
- Muqanov k-si, 49r («QazaqInvestStroy» JShS).
- «Central Avenue» TK, Gogol kóshesi, 34/5 ýchaskesi («RGB Group» JShS).
- «Amedına» TK, 137-shi eseptik oram, 343 («Sunrise» JShS).
- Qarbyshev k-si, 2/5 qurylysy (Holodkov V.K.).
- «Baqytty otbasy» TK, Gapeev kóshesi, 4e («KKK Beton» JShS).
- KTK, Remeslennyı tuıyq kóshesi, 2-bólim (Grıgorıan sh. N.).
- «Inju City» TK 5, 6, 7 bloktar, Respýblıka dańǵyly, 23 («Orda Minerals» JShS).
«MSQB salynyp jatqan turǵyn úı keshenderinde qujattar paketiniń bar-joǵyn tekserýdi usynady. Ol úshin senim telefonyna habarlasýǵa bolady: (8-7212) 43-22-43», - delingen habarlamada.
