Qaraǵandyda Vavada oıynshylarynyń aqshasyn qolma-qol aqshaǵa aınaldyrǵan top ustaldy
ASTANA. KAZINFORM- Qarjylyq monıtorıng agenttiginiń Qaraǵandy oblysy boıynsha departamenti prokýratýranyń úılestirýimen «Vavada» ınternet-kazınosy oıynshylarynyń aqshasyn qabyldap, qolma-qol aqshaǵa aınaldyrýdy uıymdastyrǵan drop-shottardy basqarýshy toptyń áreketin toqtatty.
Agenttiktiń baspasóz qyzmetiniń habarlaýynsha, shemaǵa barlyǵy 23 drop-shot tartylyp, olar arqyly 415 mln teńgeden astam somaǵa operatsııa júrgizilgen.
Tergeý dereginshe, 2026 jylǵy qańtarda osy shemany uıymdastyrýshylar ınternet-kazıno ókilderimen Qazaqstan aýmaǵynda aqsha qabyldaý jáne shyǵarý jóninde kelisimge kelgen.
Keıin top músheleriniń biri onyń jumysyn úılestirip, kazıno ókilderimen baılanys ornatqan. Ekinshisi dropperlerdi izdep, olardyń bank shottaryna qol jetkizý isin uıymdastyrǵan jáne operatorlardy iriktegen.
Qaraǵandyda jalǵa alynǵan keńsede operatorlar táýlik boıy aýysymmen jumys istegen.
-Eki kúdiktige bultartpaý sharasy retinde úıqamaq belgilendi. Sottyń sanktsııasymen olardyń múlkine, sonyń ishinde jeke turǵyn úıine, eki jer telimine jáne Mercedes-Benz avtokóligine tyıym salyndy,-delingen habarlamada.
Qylmystyq is sotqa joldandy.
Qazaqstan Respýblıkasy Qylmystyq-protsestik kodeksiniń 201-babyna sáıkes ózge aqparat jarııa etilmeıdi.
Osyǵan deıin alaıaqtardyń QMA atynan jalǵan hat taratyp, azamattardyń derekterin alýǵa tyrysqany týraly jazdyq.
